Թուրք կին գործարարները Երևանում. «Փակ սահմանը ճիշտ չէ»

Ապրիլի 8-9-ը Երևանում կայացավ «Առևտրային և տնտեսական հարաբերությունների հաստատում» թեմայով հայ և թուրք գործարար կանանց ֆորումը, որը կազմակերպել էին  ԱՄՆ Միջազգային զարգացման գործակալության « Ձեռնարկությունների զարգացման և շուկայի մրցունակության ծրագիրը»(EDMC)  և «Կանանց ֆորում» հասարակական կազմակերպությունը:  

Ֆորումի նպատակն էր ծանոթացնել թուրք գործարար կանանց Հայաստանի բիզնես միջավայրին, հարկային և մաքսային համակարգին: Ֆորումին մասնակցեցին  25 հայ և 30 թուրք կին գործարարներ, ովքեր քննարկեցին  գործնական կապերի հաստատման հնարավորությունները: Ֆորումի ընթացքում մի քանի ուշագրավ հայտարարություններ հնչեցին՝ փակ սահմանը բացելու անհրաժեշտության մասին:

Ապրիլի 8-ին ՝ ֆորումի բացմանը մասնակցել և ելույթով հանդես են եկել ԱՄՆ ՄԶԳ հայաստանյան առաքելության տնտեսական աճի գրասենյակի մասնավոր հատվածի մասնագետ Դիանա Ավետյանը, Թուրքիայի արևելյան և հարավարևելյան գործարար կանանց «Դոքունքադ» միության նախագահ Նևին Իլը, Դիարբեքիրի առևտրի և արդյունաբերության պալատի նախագահ Դիյաեդին Գեզերը և «Կանանց ֆորում» կազմակերպության նախագահ Լիլիթ Ավետիսյանը: Բանախոսները կարևորել են միջոցառմանը գործարար կանանց մասնակցությունը, որը նրանց համար գործնական կապեր հաստատելու և ուղղակի բանակցություններ սկսելու հնարավորություն է:

Մասնավորապես, Թուրքիայի Դիարբեքիր քաղաքի առևտրի և արդյունաբերության պալատի նախագահ Դիյաեդին Գեզերը հայտարարել է, որ հայ-թուրքական առևտրատնտեսական կապերի զարգացումը կնպաստի պաշտոնական Երևանի և Անկարայի միջև հարաբերությունների կարգավորմանը:

«Հայ-թուրքական սահմանի բացումը և երկաթուղու վերագործարկումը լավ կանդրադառնան մեր երկրների միջև գործարար կապերի հաստատման և զարգացման վրա: Մենք գիտենք, որ Հայաստանում գյուղատնտեսությունն ու տեքստիլ արդյունաբերությունը սիրողական մակարդակի վրա են, մինչդեռ մեր երկկողմ առևտրատնտեսական հարաբերությունները մեծ ներուժ ունեն: Սահմանի բացումից հետո Հայաստանն իր արտաքին առևտրի 65 %-ը կիրականացնի Թուրքիայի հետ»,- ասել է Դիարբեքիրի առևտրի և արդյունաբերության պալատի ղեկավարը:

Նրա խոսքերով, Հայաստանի և Թուրքիայի գործարարները պետք է շարունակական աշխատանք տանեն երկրների միջև հարաբերությունների կարգավորման ուղղությամբ՝ սկսելով առևտրատնտեսական հարաբերությունների հաստատումից:

Թուրքիայի արևելյան և հարավարևելյան գործարար կանանց «Դոքունքադ» միության նախագահ Նևին Իլն իր խոսքում նկատել է, որ Հայաստանի և Թուրքիայի միջև սահմանը փակ է երրորդ երկրների մեղքով:

«Մենք պատմական աշխատանք ենք տանում՝ փորձելով պատմական խնդիրները լուծել առևտրի միջոցով: Անցյալի վերքերը պետք է բուժել, հարաբերությունները պետք է կարգավորվեն: Սա մեր պատասխանատվությունն է սերնդների առջև: Առևտուրը լեզու չի ճանաչում, սահման չի ճանաչում, երկիր չի ճանաչում…. Հայաստանը մեզ համար շատ կարևոր երկիր է՝ 1993թ-ից փակ սահմանը ճիշտ չէ», – հայտարարեց Նևին Իլը:

Ֆորումի շրջանակներում  կայացած ցուցահանդեսին հայ և թուրք գործարար կանայք ներկայացրել են իրենց արտադրանքը,  իսկ այսօր ` ապրիլի 9-ին, մասնակիցները ծանոթացել են   Հայաստանի հարկային և մաքսային ընթացակարգերին: Այնուհետև տեղի են  ունեցել  «բիզնեսը՝ բիզնեսին» ձևաչափով հանդիպումներ և գործնական այցելություններ:

Նշենք, որ Ֆորումի մասնակից կին գործարարներ  ներկայացնում են տարբեր ոլորտներ՝ զբոսաշրջությունից, բժշկական կոսմետոլոգիայից, հրուշակեղենի, արհեստագործական իրերի ու տեքստիլի արտադրություններից մինչև շինարարություն և շինանյութերի արտադրություն, ապրանքների փաթեթավորում, կաթնամթերքի արտադրություն և բեռնափոխադրումներ: