«Հրետակոծություններից տուժող կանանց ձայնը պետք է լսելի լինի նաև միջազգային ասպարեզում». Զարուհի Բաթոյան

ՄԱԿ-ի Գլխավոր ասամբլեայի 73/40 որոշման համաձայն սեպտեմբերի 23-ին Նյու Յորքում  ՄԱԿ-ի Գլխավոր Ասամբլեայի 75-րդ նստաշրջանի շրջանակում   կանցկացվի բարձր մակարդակի հատուկ նիստ՝ ի նշանավորումն Կանանց հարցերով համաշխարհային չորրորդ համաժողովին ընդունված  Պեկինի  հռչակագրի և Գործողությունների ծրագրի 25-ամյակի: Նիստի հիմնական թեման «Գենդերային հավասարության և կանանց ու աղջիկների իրավունքների և հնարավորությունների ընդլայնման արագացումն» է:

Հուլիսի 21-ին  ՄԱԿ Գլխավոր ասամբլեայի նախագահի գրասենյակի և ՄԱԿ-Կանայք (UN-Women) կառույցի  նախաձեռնությամբ  տեղի էր ունեցել  նախապատարաստական  առցանց հանդիպում, որի նպատակն էր    Պեկինի  հռչակագրի և Գործողությունների ծրագրի 25-ամյակի կապակցությամբ սեպտեմբերին հրավիրվող հատուկ նիստին ընդառաջ  ընդլայնված քննարկումներ կազմակերպել   բոլոր  շահագրգիռ կողմերի մասնակցությամբ: Միջոցառմանը մասնակցել էր նաև ՀՀ  Աշխատանքի և սոցիալական հարցերի նախարար Զարուհի Բաթոյանն՝  ելույթ ունենալով  օրակարգի  «Գենդերային հավասարության առաջնորդների միջև երկխոսություն» հատվածում:

«Ինչպես գիտեք, Հայաստանը նախագահում է ՄԱԿ Կանանց կարգավիճակի հանձնաժողովի 64-րդ նստաշրջանը, իսկ հուլիսի 1-ին Հայաստանն ընտրվել է «Հավասարության սերունդ» ֆորումի շրջանակներում ձևավորված «Տեխնոլոգիաներ և նորարարություն» կոալիցիայի առաջնորդ երկիր: Սա ևս մեկ անգամ հաստատում է Հայաստանի պատրաստակամությունը՝ աջակցելու գենդերային հավասարության ապահովման և կանանց նկատմամբ բռնության վերացման ուղղությամբ գլոբալ ջանքերին»,- ասել է Աշխատանքի և սոցիալական հարցերի նախարար Զարուհի Բաթոյանն իր ելույթում:

Նախարարը նշել է, որ բազմակի և հատվող խտրականության ենթարկվող կանանց և աղջիկներին քաղաքականությունները հասանելի դարձնելու նախապայմանը նրանց մասնակցությունն է բոլոր փուլերում։

Զարուհի Բաթոյանն անդրադարձել է նաև անցյալ շաբաթ հայ-ադրբեջանական սահմանին տեղի ունեցած ռազմական գործողություններին և միջազգային հանրության ուշադրությունը հրավիրել դրանց հետևանքով տուժող քաղաքացիների և հատկապես կանանց խնդիրներին.

«Այս համատեքստում կցանկանայի նշել, որ այս օրերին Հայաստանը, ինչպես աշխարհի մյուս երկրները, պայքարում է համավարակի դեմ։ Կին բուժաշխատողների մասնակցությունը, նրանց փորձի վրա հիմնված առաջարկներն անգնահատելի են ընդհանուր պայքարի համատեքստում։ Ցավոք, վերջին օրերին Հայաստանի քաղաքացիների օրակարգում է ևս մեկ հարց՝ Ադրբեջանի կողմից հայ-ադրբեջանական սահմանին հրադադարի ռեժիմի խախտումը։ Հայաստանի սահմանամերձ գործարաններից մեկը, որն օրական արտադրում է երեք հարյուր հազար դիմակ, օրեր առաջ հրետակոծվեց։ Դժվարին այս իրավիճակում դիմակ արտադրող կանանց և այն բուժաշխատող կանանց, որոնց համար դիմակների առկայությունը կենսական է, ձայնը պետք է լսելի լինի ոչ միայն Հայաստանի ներսում, այլ նաև միջազգային ասպարեզում։ Չէ՞ որ, երբ որոշում կայացնողները լսում են ռազմական գործողությունների արդյունքում տուժող կանանց ձայնը, չեն կարող շեղվել խաղաղության օրակարգից»,- ասել է նախարարը։

Նա անդրադարձել է նաև գենդերային հավասարության խնդիրներին և նշել, որ կանանց նկատմամբ խտրականության բոլոր ձևերը վերացնելու համար երկխոսությունը առանցքային է.

«Հայաստանի կառավարությունն գենդերային հավասարության հասնելու հարցում վճռական է։ Այդ վճռականությունը հիմնված է քաղաքական երկխոսության վրա։ Եթե փոխվստահությունը շահագրգիռ կողմերի միջև ամուր է, և՛ կառավարությունը, և՛ քաղաքացիական հասարակությունը չեն ընկրկրկում»,- ասել է նա:

Նախարարը խոսել է նաև օրեր առաջ հաստատված Ազգային անվտանգության ռազմավարության վերաբերյալ, որն ի դեպ, մշակվել է կին դերակատարների ուղիղ մասնակցությամբ։ Ըստ նախարար՝ ռազմավարությամբ ամրագրվել է, որ բռնությունից զերծ հանրության հայեցակարգը հասարակական համերաշխության կարևոր նախապայման է.

«Այդ դրույթը համագործակցության և քաղաքական երկխոսության ձեռքբերումն էր, որ ամրագրվեց որպես ներհայկական համակեցության կանոն։ Սա է մեր պատկերացումը գենդերային հավասարության հասնելու համար տարբեր կողմերի համագործակցության մասին։ Հուսով եմ, որ այդ հարցում համագործակցության մեր փորձը օրինակելի կդառնա շատ հասարակությունների համար և կամրապնդի գլոբալ համագործակցությունը հանուն բոլոր կանանց և աղջիկների»,- եզրափակել է նախարարը։

Աղբյուրը՝ ՀՀ աշխատանքիր սոցիալական հարցերի նախարարություն