ՏԻՄ ընտրություններ. առաջադրված կանանց թվում նաև «ոչ իրական» թեկնածուներ են նկատվում

Կանայք և ընտրությունները

Ապրիլի 17-ին տեղական ինքնակառավարման մարմինների ընտրություններ են նշանակված Արարատի, Արմավիրի, Լոռու, Վայոց Ձորի, Արագածոտնի, Կոտայքի, Գեղարքունիքի, Սյունիքի 36 համայնքներում: Դրանցից 33-ում համայնքապետ են ընտրելու:

Համայնքապետի ընտրություններ

Նախ նկատենք, որ այս ընտրությունների արդյունքում Հայաստանում կին քաղաքապետների թիվը փոփոխության չի ենթարկվի: Թալինը, Սպիտակն ու Հրազդանը հետագայում ղեկավարելու հայտ ներկայացրել են միայն տղամարդիկ:

Գյուղապետների թեկնածուների վերաբերյալ ԿԸՀ հրապարակած տեղեկատվությունը վերլուծելիս նկատում ենք, որ համայնքապետի ընտրություններում առավել «ակտիվ» են լոռեցի կանայք:

Լոռու մարզի Դաշտադեմ համայնքը 2012-ից ղեկավարող Մարինե Խռոյանն կրկին առաջադրվել է: Նրան սատարում է հարազատ կուսակցությունը՝ ՀՀԿ-ն: Երկրորդ թեկնածուն անկուսակցական Վահան Աղայանն է, նա ինքնաառաջադրված է:

Լոռու մարզի Խնկոյան համայնքում ևս երկու թեկնածու է առաջադրված: Գործող գյուղապետ ՀՀԿ-ական Վարուժան Համբարձումյանի հետ մրցելու է եղբոր աղջիկը՝ Ռուզաննա Համբարձումյանը: Գյուղապետը WomenNet.am-ի հետ զրույցում խոստովանեց, որ առաջադրումը կատարվել է զուտ օրենքի պահանջն ապահովելու համար:

Արմավիրում համայնքապետ են ընտրելու ինը գյուղերում, միայն մեկում՝ Այգեկում է կին թեկնածու առաջադրվել: Այստեղ էլ ՀՀԿ-ական գործող գյուղապետի հետ առաջադրվել է գյուղապետարանում որպես օպերատոր աշխատող, ՀՀԿ-ական Քնարիկ Եղիազարյանը:

Կարող ենք ենթադրել, որ Լոռու մարզի Սարչապետ համայնքում ևս կնոջ առաջադրումը ձևական է, և իրական պայքար չի ընթանալու: Գործող ՀՀԿ-ական գյուղապետ Բորիս Բարոյանի հետ առաջադրվել է անկուսակցական Անժելա Մարտիրոսյանը, ով աշխատում է գյուղապետարանում՝ որպես աշխատակազմի քարտուղար:

Արագածոտնում ՏԻՄ ընտրություններ են նշանակված երկու համայնքում՝ Թալին, Վերին Սասնաշեն: Առաջադրվածների թվում կանայք չկան: Արարատում հինգ համայնքում գյուղապետ են ընտրելու: Այստեղ էլ կանայք բացակայում են:

Գեղարքունիքի երկու համայնքներից որևէ մեկում կին թեկնածու չի առաջադրվել: Կոտայքում ՏԻՄ ընտրություններ են անցկացվելու հինգ համայնքներում, կին թեկնածուներ չկան: Սյունիքի երեք գյուղերում համայնքապետի կին թեկնածուներ չեն առաջադրվել:

Վայոց Ձորում համայնքապետ են ընտրելու Գետափում: Բոլոր չորս թեկնածուներն արական սեռի ներկայացուցիչներ են:

Ավագանու ընտրություններ

Նույն օրը՝ ապրիլի 7-ին վեց համայնքներում անացկացվելու են նաև ավագանու անդամի ընտրություններ: Թալինում ավագանու անդամի ընտրության համար առաջադրվել է 32 թեկնածու: Նրանցից երեքն են կանայք: Նկատենք, որ Թալինի գործող ավագանին ունի 11 անդամ, որից մեկն է կին:

Արմավիրի մարզի Նոր Կեսարիա համայնքում ավագանու անդամի ընտրությունների համար առաջադրվել է 8 թեկնածու, որից միայն մեկն է կին: Լոռու մարզի Սարամեջ գյուղում նույն պատկերն է:

Լոռու մարզի Սարչապետ համայնքում ավագանու 8 թեկնածու կա, կին չկա: Սյունիքի Կուրիս համայնքում 6 թեկնածուներից մեկը կին է, իսկ Չափնի գյուղում վեց թեկնածուից երկուսն են կանայք:

Նշված բոլոր համայնքներում նախընտրական քարոզչությունը կմեկնարկի մարտի 30-ին և կշարունակվի մինչև ապրիլի 15-ը: Թեկնածուներն ինքնաբացարկի դիմումներ կարող են ներկայացնել մինչև ապրիլի 7-ը՝ ժամը 18:00-ն: Հենց այդ ժամանակ էլ, ամենայն հավանականությամբ, ի հայտ կգան ոչ իրական թեկնածուները՝ լինեն դրանք կին թե տղամարդ:

Հ. Կարապետյան