The Telegraph. Ամալ Քլունին կներկայացնի Հայաստանը Մարդու իրավունքների եվրոպական դատարանում

 Դեռես անցյալ տարվա դեկտեմբերին  հայտնի դարձավ, որ հոլիվուդյան դերասան Ջորջ Կլունիի կինը՝ հայտնի իրավաբան-միջազգայնագետ  Ամալ Քլունին (Ալամուդդին), ներկայացնելու է Հայաստանի  շահերը  Մարդու իրավունքների եվրոպական դատարանում Հայոց ցեղասպանությունը հերքող թուրք քաղաքական գործիչ Դողու Փերինչեքի գործով:   Թեմային օրերս  անդրադարձ է կատարել    բրիտանական «The Telegraph» պարբերականը:

Հիշեցնենք, որ 2008 թվականին Շվեյցարիայի դատարաններից մեկը Թուրքիայի աշխատավորական կուսակցության առաջնորդ Դողու Փերինչեքին դատապարտել է Հայոց ցեղասպանության ժխտման համար: Փերինչեքը դիմել է ՄԻԵԴ, եւ 2013 թվականի դեկտեմբերին դատարանը բավարարել է Շվեյցարիայի դեմ նրա հայցը: Շվեյցարիան բողոքարկել է ՄԻԵԴ-ի որոշումը, ինչից հետո Հայաստանը նույնպես  դիմել է Եվրադատարան եւ ներկայումս հանդես է գալիս որպես երրորդ կողմ: «The Telegraph» պարբերականը նշում է, որ Հայաստանի շահերը ներկայացնելու է հայտնի փաստաբանների խումբը՝ Ամալ Ռամզի Կլունիի մասնակցությամբ:

«Հայերը պնդում են, որ Ցեղասպանության հերքումը պետք է հանցագործություն համարվի, ինչպես վեց միլիոն հրեաների Հոլոքոստի հերքումը բազմաթիվ երկրներում քրեորեն պատժելի հանցագործություն է համարվում: Նրանք ասում են, որ Ստրասբուրգի դատարանի դատավորները մի շարք իրավական եւ փաստական սխալներ են թույլ տվել, երբ չեղյալ են համարել Փերինչեքի սկզբնական դատավճիռը»,- գրում է բրիտանական պարբերականը:

Ըստ «The Telegraph»-ի, Ամալ Կլունին աշխատելու է իր ղեկավարի՝ թագավորական փաստաբան Ջեֆրի Ռոբերթսոնի հետ միասին: Լոնդոնի փաստաբանական գրասենյակը հաստատել է այս գործում նրանց մասնակցության փաստը: Պարբերականը նաեւ հիշեցնում է, որ Ռոբերթսոնը վերջերս գիրք է հրատարակել՝ «Անհարմար Ցեղասպանություն. ո՞վ է հիմա հիշում հայերի մասին»: Ըստ հեղինակների, հոկտեմբերին հրատարակված գիրքն ապացուցում է, որ 1915-ի սարսափելի իրադարձությունները, որոնց  ընթացքում օսմանյան թուրքերը մինչեւ 1.5 մլն հայ սպանեցին, անկասկած, մարդկության դեմ հանցագործություն են, որն այսօր հայտնի է որպես ցեղասպանություն:

Բրիտանական թերթն ընդգծում է, որ «The New York Times»-ը եղեռնը նկարագրել է որպես «ամբողջ հայ ժողովրդի ոչնչացման ծրագիր», ինչպես նաեւ նշել, որ Թուրքիան շարունակում է հերքել Ցեղասպանությունը, չնայած այն ճանաչում է աշխարհի ավելի քան 20 պետություն:

Ըստ «The Telegraph»-ի, հոլիվուդյան դերասանի հետ պսակադրությունից երկու շաբաթ անց Օքսֆորդում կրթություն ստացած Ամալ Կլունին մեկնել է Աթենք, որպեսզի հունական կառավարությանը խորհրդատվություն տրամադրի, թե ինչպես պետք է վարել Էլգինի մարմարի հետ կապված գործը, որը ցուցադրվում է Լոնդոնի Բրիտանական թանգարանում:

Պարբերականի համաձայն, Լոնդոնի «Դաունի-սթրիթի պալատից» փաստաբանին կոլեգիային հրավիրել են 2010 թվականին: Նա մասնագիտացած է միջազգային իրավունքի, մարդու իրավունքների եւ արտահանձնման ոլորտում: Նա տիրապետում է ֆրանսերենին եւ արաբերենին: Փաստաբանը ներկայացրել է «Wikileaks»-ի հիմնադիր Ջուլիան Ասանժի եւ Ուկրաինայի նախկին վարչապետ Յուլիա Տիմոշենկոյի շահերը: Ամալ Քլունին նաև մեղադրող կողմի անդամ էր Լիբանանի հարցով ՄԱԿ Հատուկ տրիբունալում և Հարավսլավիայի հարցով Միջազգային տրիբունալում: Ամալ Քլունին եղել է ՄԱԿ նախկին գլխավոր քարտուղար Քոֆի Անանի խորհրդականը2012-2013 թթ. Սիրիայում նրա առաքելության ժամանակ:

Նշենք, որ «Դողու Փերինչեքը՝ Շվեյցարիայի դեմ» գործով դատական նիստը ՄԻԵԴ-ում կայանալու է 2015 թվականի հունվարի 28-ին: