“Թույլ տվեք, որ մեր քույրիկները ծնվեն”

Գենդերային կարծրատիպեր

Այսօր Մեդիա կենտրոնի սրահում տեղի ունեցավ քննարկում՝ «Պայքար սեռով պայմանավորված հղիությունների արհեստական ընդհատումների դեմ» թեմայով:

Քննարկմանը մասնակցում էին ՀՀ Առողջապահության նախարարության մոր և մանկան առողջության պահպանման վարչության պետ Կարինե Սարիբեկյանը, ՄԱԿ-ի բնակչության հիմնադրամի գործադիր ներկայացուցիչ Գարիկ Հայրապետյանը, մեդիա փորձագետ Սամվել Մարտիրոսյանը և «Իսկ դու ունե՞ս աղջիկ» ֆեյսբուքյան ֆլեշմոբի նախաձեռնողներից Արամազդ Ղալամքարյանը: Բանախոսները փորձում էին պատասխանել հարցին `Ինչպե՞ս փոխել հանրության մտածողությունը:

Նշվեց, որ վերջերս սկիզբ առած «Իսկ դու ունե՞ս աղջիկ» ֆեյսբուքյան ակցիան յուրահատուկ նշանակություն ունեցավ պտղի սեռով պայմանավորված հղիության ընդհատումների վերաբերյալ հայ հանրության իրավագիտակցությունը բարձրացնելու առումով : Ակցիայի նախաձեռնող Արամազդ Ղալամքարյանը վստահեցրեց, որ մտածելակերպը փոխելու գործիքներից մեկն էլ անկեղծ խոսքն է, որն էլ այս դեպքում արտահայտվեց ֆլեշմոբի տեսքով:

ՏՏ անվտանգության փորձագետ Սամվել Մարտիրոսյանի կարծիքով Հայաստանում՝ պտղի սեռով պայմանավորված հղիության ընդհատումները չեն ընկալվում որպես խնդիր, բայց նման ֆլեշմոբերը փոխում են մարդկանց մտածողությունը . «Այս մտածելակերպի փոփոխությանը դժվար կլինի հասնել կարճ ժամանակում: Ֆեյսբուքյան ակտիվությոնը դեռեւս միայն էմոցիոնալ հարթության վրա է»:

Առողջապահության նախարարության մոր և մանկան առողջության պահպանման վարչության պետ Կարինե Սարիբեկյանը փաստեց, որ շուրջ 30 տարի առաջ Հայաստանում այս խնդիրը չկար, քանի որ երեխաների միջին թիվը 4-5 էր , և 5 երեխայից գոնե մեկը տղա կլիներ: Անկախության տարիներին ծնելիության անկում տեղի ունեցավ, այսօր մեկ կնոջն ընկնող երեխաների միջին թիվը 1 կամ 2 է: Բժշկակական տեխնոլոգիաների զարգացմանը զուգահեռ տարածվեցին պտղի սեռով պայմանավորված հղիությանների ընդահտումները :

ՄԱԿ-ի բնակչության հիմնադրամի գործադիր ներկայացուցիչ Գարիկ Հայրապետյանի վկայությամբ Հայաստանում այդ խնդիրը լուրջ է, դա են փաստում վիճակագրական տվյալները եւ հետազոտությունների արդյունքները: Խնդիրը հնարավոր է լուծել ոչ միայն օրենսդրական փոփոխություններով, այլ նաև սոցիալական աջակցությանը միտված քայլերով, մասնավորապես, Սոցիալական հարցերի նախարարության հետ մշակվում է օրենսդրական փոփոխությունների մի փաթեթ, որով սոցիալական օժանդակություն է նախատեսվում երրորդ և չորրորդ երեխաների դեպքում:

Մանրամասները Մեդիա կենտրոնի տեսանյութում.