Վանաձոր-2016. Նախնական տվյալներով ավագանիում 7 կին կլինի/ լրացված

Հոկտեմբերի 2-ին Վանաձորում անցկացված ՏԻՄ  ընտրությունների նախնական արդյունքների համաձայն  Վանաձորի ավագանիում ներկայացված լինելու անցողիկ շեմը հաղթահարել է 5 կուսակցություն՝ Հայաստանի Հանրապետական կուսակցությունը `37.54%, «Լուսավոր Հայաստանը»` 27.48%, «Հայկական վերածնունդը»`13.33%, «Բարգավաճ Հայաստանը»`7.24%, և Հայ Յեղափոխական Դաշնակցությունը` 6.36%։

Ինչպես և Գյումրիում, Վանաձորում ևս առաջին անգամ ՏԻՄ ընտրությունն անցկացվեցին  համամասնական ընտրակարգով, և Վանաձորի ավագանին ևս  կունենա 33 անդամ, որոնցից նախնական տվյալներով,    7-ը կին են լինելու: Դա, ըստ ցուցակների,  իսկ թե ինչ որոշում կընդունեն  ավագանիում ներկայացված կուսակցությունները եւ կլինեն, արդյոք, իմքնաբացարկներ կանանց կողմից, ցույց կտա ժամանակը:

ՀՀ կենտրոնական ընտրական հանձնաժողովի կողմից հրապարակած նախնական արդյունքների համաձայն ավագանիում քաղաքական ուժերի ներկայացվածության պատկերը հետևյալն է.

Հայաստանի Հանրապետական կուսակցությունը կունենա 13  ավագանու անդամ, որոնցից  3-ը կլինեն կանայք՝ ‹‹Լոռու մարզային հոգենյարդաբանական դիսպանսեր›› տնօրեն Գայանե Քալանթարյանը, Վանաձորի թիվ 5 ՆՈՒՀ տնօրեն Անահիտ Փոլադյանը և ՀՀԿ Լոռու տարածքային կազմակերպության կազմակերպիչ Մարինե Հովհաննիսյանը:

«Լուսավոր Հայաստանը» Վանաձորի ավագանիում կունենա 10 անդամ, նրանցից միայն երկուսը կլինեն կանայք՝ «Հույս Հայաստանի համար» բարեգործական կլինիկայի բժիշկ -պատասխանատու Կարինե Ղուկասյանը և ԵԹԿՊԻ Վանաձորի մասնաճյուղ-դասախոս Անահիտ Կարապետյանը:

Վերափոխված «Օրինաց երկիր» կուսակցությունը, որն այս ընտրություններին մասնակցեց «Հայկական վերածնունդ» անվան տակ, ավագանիում կունենա 5 անդամ: Նրանցից միայն  մեկն է կին՝  «Աջակցություն հղի կանանց» ծրագրի սոցիալական աշխատող Մերի Եղիազարյանը:

«Բարգավաճ Հայաստան» կուսակցությունը, որը միակն էր այս ՏԻՄ ընտրություններում, որի ընտրական ցուցակը կին էր գլխավորում, ավագանիում կունենա միայն 3 անդամ: Այծեմնիկ Օհանյանը, որը կուսակցության հաղթանակի դեպքում կդառնար անկախ Հայաստանի պատմության մեջ Վանաձորի առաջին կին քաղաքապետը, միակն է, որ ներկայացված կլինի ավագանիում:

Ինչ վերաբերում է Դաշնակցությանը, ապա կուսակցությունը Վանաձորի ավագանիում կունենա միայն երկու անդամ, որոնցից և ոչ մեկը, համաձայն ընտրական ցուցակի, կին չէ: Սակայն վերջնական որոշումը պետք է կուսակցությունն ընդունի: Համենայն դեպս,  ՀՀ  նոր Ընտրական օրենսգրքի պահանջով    կուսակցությունը պարտավոր է իր խմբակցության կազմում երկու սեռի ներկայացուցիչներ ապահովել:

Մասնավորապես,  նոր   Ընտրական օրենսգրքի   114 հոդվածի կետ 6-ում նշված է.

«Ընտրական ցուցակից ընտրվում է այն թեկնածուն, որի հերթական համարն ընտրական ցուցակում փոքր կամ հավասար է տվյալ ընտրական ցուցակին հասանելիք մանդատների թվին: Եթե դրա արդյունքում կուսակցության (կուսակցությունների դաշինքի) բոլոր մանդատները բաժին են հասնում նույն սեռի ներկայացուցիչներին, ապա ցուցակի հերթականությամբ վերջին ընտրվածի մանդատը տրվում է ընտրական ցուցակի չներկայացված սեռի նվազագույն համարով թեկնածուին, եթե կա»:

Նշենք, որ հոկտեմբերի 2-ի  Վանաձորի  ավագանու ընտրություններին մասնակցեց 8  կուսակցություն: Նրանց նախընտրական ցուցակներում ընդհանուր թվով 326 թեկնածու էր ներկայացված, որոնցից  93-ը կամ   29 տոկոսն են կանայք: 

Լիա Խոջոյան