Կանայք Երևանի ավագանու կազմում. հետընտրական ամփոփում

Երևանի ավագանու սեպտեմբերի 23-ին կայացած արտահերթ ընտրություններին մասնակցել է 12 քաղաքական ուժ՝ 8 կուսակցություն և 4 դաշինք:

Ընտրելու իրավունք ունեցող 848.346 քաղաքացուց Երևանի ավագանու արտահերթ ընտրությունների քվեարկությանը մասնակցել են 370.365-ը կամ ընտրողների 43,65 տոկոսը: Ընտրություններին մասնակցող 12 քաղաքական ուժերից 6-ին չի հաջողվել հատել 1 տոկոսի շեմը, երեքը ստացել են 1-2% ձայն:

Ընտրությունների վերջնական արդյունքները (սեպտեմբերի 30, 2018)
Կուսակցություն /Դաշինք			Քվե	%	Մանդատ
	1.	«Իմ քայլը» դաշինք	294 092	81,06%	57
	2.	ԲՀԿ	25 218	6,95%	5
	3.	«Լույս» դաշինք	18 114	4,99%	3
	4.	ՀՅԴ	5882	1,62%	0
	5.	«Երկիր ծիրանի»	5059	1,39%	0
	6.	«Օրինաց երկիր»	3947	1,09%	0
	7.	«Երևանցիներ» դաշինք	2986	0,82%	0
	8.	«Ժառանգություն» կուսակցություն	2709	0,75%	0
	9.	«Երևանի հանրություն» դաշինք	2502	0,69%	0
	10.	«Ժողովրդավարական ուղի»	799	0,22%	0
	11.	Ռեֆորմիստների կուսակցություն	792	0,22%	0
	12.	«Հայք» կուսակցություն	692	0,19%	0

Աղբյուրը՝ ԿԸՀ

Ընտրությունների արդյունքների համաձայն՝ Երևանի ավագանու կազմում երեք ուժ է ընդգրկվել՝ «Իմ քայլը» դաշինքը (81,06%), «Բարգավաճ Հայաստան» կուսակցությունը (6,95% տոկոս), «Լույս» դաշինքը (4,99 %): Թեև «Լույս» դաշինքը չի հաղթահարել անցումային շեմն ավագանու կազմում ընդգրկվելու համար (դաշինքների համար այն կազմում է 8 տոկոս, իսկ կուսակցությունների համար՝ 6 տոկոս), նրա օգտին գործեց օրենսդրության այն դրույթը, որի համարձայն՝ ներկայացուցչական մարմնի կազմում ցանկացած պարագայում պետք է ներկայացված լինի առնվազն 3 քաղաքական ուժ:

«Երևան քաղաքում տեղական ինքնակառավարման մասին» ՀՀ օրենքի համաձայն՝ եթե ավագանու ընտրությունների արդյունքով ընտրություններին մասնակցող կուսակցություններից մեկը ստանում է ավագանու անդամների տեղերի 50 տոկոսից ավելին, ապա այդ կուսակցության թեկնածուների ցուցակի առաջին հորիզոնականում գտնվող անձը օրենքի ուժով համարվում է ընտրված քաղաքապետ: Այդ դրույթի համաձայն՝ «Իմ քայլը» դաշինքի ցուցակը գլխավորող Հայկ Մարությանը ստանձնեց քաղաքապետի պաշտոնը:

Կանանց կողմից ղեկավարվող քաղաքական ուժերից միայն մեկն ընդգրկվեց ավագանու կազմում՝ «Բարգավաճ Հայաստանը»: Սակայն այդ կուսակցության ցուցակը գլխավորող Նաիրա Զոհրաբյանը դիմեց ինքնաբացարկի՝ պահպանելով իր ԱԺ պատգամավորական մանդատը: Ընտրություններից անմիջապես հետո ինքնաբացարկ հայտնած վեց թեկնածուներից երկուսն էին կին: Նրանց թվում, բացի Նաիրա Զոհրաբյանից, «Բարգավաճ Հայաստան» կուսակցության ընտրական ցուցակում ընդգրկված Նազիկ Ավդալյանն էր: Ավելի ուշ՝ մանդատները վերցնելուց հետո, ինքնաբացարկ է հայտնել ևս մեկ կին՝ Սրբուհի Ղազարյանն «Իմ քայլը» խմբակցությունից, ով կշարունակի վարչապետի խորհրդականի իր աշխատանքը կառավարությունում:

Երևանի ավագանու արտահերթ ընտրությունների արդյունքում «Իմ քայլը» դաշինքը ստացավ 57 մանդատ, «Բարգավաճ Հայաստանը»՝ 5, «Լույս» դաշինքը՝ երեք: Մանդատներից 18-ը կամ 27.6 %-ը բաժին են հասել կանանց:

«Իմ քայլը» դաշինքի ստացած 57 մանդատից 15-ը կամ 26.3 % -ը բաժին էր ընկել կանանց: Նրանց թվում են՝ Լուսինե Բադալյանը, Իզաբելլա Աբգարյանը , Նարինե Խաչատուրյանը , Գայանե Մելքոմյանը, Գայանե Աբրահամյանը , Լիլիթ Պիպոյանը , Եվա Թովմասյանը , Գայանե Եղիազարյանը, Սոնա Ղազարյանը , Արուսյակ Ջուլհակյանը , Գայանե Վարդանյանը, Օվսաննա Հովսեփյանը , Սաթենիկ Մկրտչյանը , Հասմիկ Խաչունցը, Արփենիկ Մարությանը:

ԲՀԿ խմբակցության հինգ անդամից մեկն է կին, ինչը 20% է կազմում: Մայրաքաղաքի ավագանու անդամի մանդատ է ստացել Հռիփսիմե Առաքելյանը :

«Լույս» դաշինքի խմբակցության երեք անդամից երկուսը կամ 67%-ը կանայք են՝ Անի Խաչատրյանը և Անի Սամսոնյանը:

Համեմատության համար՝ կին թեկնածուները «Լույս» դաշինքի ընտրական ցուցակում 35,7% էին կազմում, «Բարգավաճ Հայաստան» կուսակցության ցուցակում՝ 30,7% և «Իմ քայլը» դաշինքի ցուցակում՝ 28,8 % էին:

Նորընտիր ավագանու երեք խմբակցություններից ոչ մեկը կին չի ղեկավարում, սակայն քարտուղարների պաշտոններում երեք խմբակցությունում էլ կանայք են ներկայացված: Ավագանու 4 հանձնաժողովներից երկուսը կանայք են ղեկավարում: Մշակույթի, կրթության և սոցիալական հարցերի հանձնաժողովի նախագահ է ընտրվել Սաթենիկ Մկրտչյանը, իրավական հարցերի հանձնաժողովի նախագահ՝ Արուսյակ Ջուլհակյանը: Քաղաքապետի նորանշանակ չորս տեղակալներից ոչ մեկը կին չէ:

Հատկանշական է նաև Երևանի ավագանու տարիքային կազմը, որն էականորեն երիտասարդացել է: Հատկապես, կին անդամների շրջանում գերակշռում են երիտասարդ տարիքի՝ 25-40 տարեկան կանայք:

Կարդացեք թեմայի շուրջ մեր կայքում ՏԻՄ ընտրություններ-2018 խորագրի ներքո.

26.10.2018

Կանայք Երևանի ավագանու կազմում. հետընտրական ամփոփում

«Քվոտան պետք է աշխատի որպես պլատֆորմ և ոչ թե որպես առաստաղ»

Առաջարկ կուսակցությունների ցուցակներում թեկնածուների սեռերի առնվազն 40/60 համամասնություն ապահովելու մասին

Երևանի ավագանու 4 մշտական հանձնաժողովներից երկուսը կանայք են ղեկավարելու

Կանանց ներկայացվածությունը Երևանի նորընտիր ավագանիում 27.6% է

Կին թեկնածուների քարոզարշավի առանձնահատկություններն ու սեքսիզմը

Կանանց մասնակցությունը Երևանի ավագանու ընտրություններում. վերլուծական տեղեկանք

Կին թեկնածուները կուսակցությունների ընտրական ցուցակներում. ամփոփում

Քաղաքի արդար կառավարման սկզբունքները նախընտրական ծրագրերում