«Չի կարելի ամեն երեք տարին մեկ հղի կանանց նման սթրեսի ենթարկել»:

Փաստաթղթեր, օրենքներ

Մեկ միլիոն դրամից ավելի աշխատավարձ ստացող կանանց մայրության նպաստը պետության փոխարեն գործատուի կողմից վճարելու մասին նոր օրենսդրական դրույթը կարող է հանգեցնել կանանց ու տղամարդկանց իրավունքների եւ հնարավորությունների սկզբունքի խախտմանը: Այսպիսի կարծիք հայտնեցին այսօր Մեդիա կենտրոնում տեղի ունեցած ասուլիսի բանախոսները: Ասուլիսը նվիրված էր «Ժամանակավոր անաշխատունակության նպաստների մասին» օրենքում լրացումներ և փոփոխություններ կատարելու մասին օրինագծի լրամշակված տարբերակի թերություններին եւ առավելություններին: Քննարկումն ընթացավ հիմնականում բարձր վարձատրվող կանանց դեպքում նախատեսվող վերին շեմի շուրջ:

Ասուլիսի մասնակից ՀՀ Մարդու իրավունքների պաշտպանի տեղակալ Տաթևիկ Խաչատրյանը խնդրահարույց բնորոշեց օինագծում առկա մեկ միլիոն և ավելի վարձատրվող աշխատող կանանց վերաբերյալ դրույթը: «Եթե գործատուի վրա նման պարտականություն դրվի, վտանգ կա, որ ֆինանսական լրացուցիչ բեռից խուսափելու համար նա կգերադասի տղամարդ ընդունել գործի և բարձր աշխատավարձով աշխատավայրերը հասանելի չեն դառնա կանանց համար»,- ասաց Տաթևիկ Խաչատրյանը:

«Այս օրինագծով բարձր վարձատրվող կանանց նկատմամբ խտրականության հիմքեր են դրվում», – ասաց «Կանանց ռեսուրսային կենտրոն» հասարակական կազմակերպության իրավաբան, փաստաբան Նվարդ Փիլիպոսյանը:

Քաղաքացիական ակտիվիստ, հաշվապահ Շողեր Բաբայանի խոսքով` Կառավարությունը վստահեցնում է, որ 1500-2000 կին չարաշահումների արդյունքում է ստացել մայրության նպաստը, մինչդեռ ինքն չարաշահումների մասին խոսելու հիմքեր չի տեսնում: Աշխատող կանայք ավելի շատ հարկ են վճարում պետական բյուջե, քան ստանում են որպես փոխհատուցում` մայրության նպաստի տեսքով: «Աշխատող կնոջ դեպքում բյուջեն շահում է, և ես չեմ հասկանում, թե հիշատակվող չարաշահումներն ինչ հաշվարկի արդյունք են: Միանշանակ, աշխատող կանանց դեպքում բյուջեն շահում է ավելին, քան վճարում է կնոջը՝ հղիանալու դեպքում: Եվ ինչքան բարձր աշխատավարձ է ստանում կինը, այդքան շատ է շահում բյուջեն», – նշեց Շողեր Բաբայանը, հավելելով, որ եթե իր հաշվարկները սխալ դուրս գան, ինքը, որպես մաթեմատիկոս, պատրաստ է վերադարձնել իր դիպլոմը:

Իր ամփոփիչ խոսքում Շողեր Բաբայանը հիշեցրեց, որ կառավարությունը առաջին անգամ չէ, որ փորձում է նվազեցնել բարձր վարձատրվող կանանց տրվող փոխհատուցումը, եւ կոչ արեց Կառավարությանը հղի կանանց ամեն երեք տարին մեկ նոր օրենքներով սթրեսի չենթարկել. «Չի կարելի ամեն երեք տարին մեկ հղի կանանց նման սթրեսի ենթարկել», – եզրափակեց նա:

Ասուլիսի ամբողջական տեսագրությունը դիտեք այստեղ: