Կանանց առաջնորդությունը հանուն հավասար ապագայի

 Կանանց միջազգային օրվա կապակցությամբ իրենց ուղերձներում ՄԱԿ-ն ու բոլոր միջազգային կազմակերպությունները շեշտադրել են կանանց առաջնորդության  ընդլայնամն խնդիրը՝  հավատարիմ մնալով այս տարի որպես  օրվա հիմնական նշանաբան ընտրված այդ թեմային:    

ՄԱԿ-Կանայք  գործադիր տնօրեն Ֆումզիլե Մլամբո-Նգկուկայի Կանանց միջազգային օրվա առթիվ հայտարարության հիմնական մեսիջը նույնպես կանանց առաջնորդությունն էր.  

«Մեր ուշադրության կենտրոնում է կանանց առաջնորդությունը և կանանց  ներկայացվածությունը բոլոր այն ոլորտներում, որտեղ ներկայումս հիմնականում տղամարդիկ են որոշումներ ընդունում, ընդ որում կանանց կյանքին վերաբերող որոշումներ: Ընդհանուր առմամբ,  կանանց շահերի ներկայացվածության  աղետալի ցածր մակարդակը չափազանց երկար ժամանակ է  դիտվում… Մեզ պետք է կանանց այնպիսի ներկայացուցչություն, որը կարտացոլի բոլոր կանանց և աղջիկների կարողությունները բոլոր ոլորտներում՝ մշակութային, սոցիալական, տնտեսական և քաղաքական: Սա է միակ ճանապարհը, որով մենք կհասնենք հասարակության մեջ իրական փոփոխությունների, որոնք կանանց  կներգրավեն  որոշումների կայացման մեջ` հավասար կերպով և ի օգուտ բոլորիս»:

ՄԱԿ-Կանայք կառույցը  նշում է նաև , որ կանանց առաջնորդության թեման  համահունչ է  մեկ շաբաթից մեկնարկող  Կանանց կարգավիճակի հանձնաժողովի 65-րդ նստաշրջանի  առաջնահերթություններին, որոնց թվում է  հանրային կայնքում և որոշումների ընդունման մակարդակում կանանց լիարժեք և արդյունավետ մասնակցության խնդիրը:  Բացի այդ կանանց  միջազգային օրը համախմբում է ողջ աշխարհի կանանց գալիք  «Հավասարության սերունդ» ֆորում / Generation Equality Forum  / շուրջ ` գործելու հանուն բոլորի հավասար ապագայի: ֆորումը գենդերային հավասարության ներդրումների և գործողությունների համար ամենակարևոր միջոցառումն է համարվում: Այն կմիավորի  կին առաջնորդներին, փորձագետներին և ակտիվիստներին ամբողջ աշխարհից` անվտանգ վիրտուալ հարթակում գալիք սերունդների համար տրանսֆորմատիվ և տևական փոփոխությունների տեսլականը նախանշելու համար: Միջոցառումը   մեկնարկում է Մեխիկոյում մարտի 29-ից 31-ը և իր գագաթնաժողովը կանցկացնի Փարիզում 2021 թ.-ի հունիսին:

Իմացեք ավելին  Generation Equality Forum-ի մասին, հանդիպեք ակտիվիստներին  և ոգեշնչվեք առաջնորդ կանանց պատմություններից:

***

Հիշեցնենք, որ անցյալ տարվա հուլիսին  Հայաստանն ընտրվեց «Հավասարության սերունդ» ֆորումի շրջանակներում ձևավորված «Տեխնոլոգիաներ և նորարարություն» գործողությունների կոալիցիայի առաջնորդ երկիր:

«Հավասարության սերունդ» ֆորումը գործում է Գենդերային հավասարության և կանանց առաջխաղացման պատասխանատու մարմնի՝ ՄԱԿ-Կանայք կառույցի  (UN-Women),  ինչպես նաև Ֆրանսիայի և Մեքսիկայի կառավարությունների նախաձեռնությամբ՝ քաղաքացիական հասարակության հետ սերտ համագործակցությամբ։

Նախաձեռնությունը միտված է պետությունների, միջազգային կազմակերպությունների և քաղաքացիական հասարակության համագործակցության խթանմանը՝ Կանանց հարցերով համաշխարհային չորրորդ համաժողովի և դրա շրջանակներում ընդունված Պեկինի հռչակագրի և Գործողությունների ծրագրի 25-րդ տարելիցի համատեքստում։

Ֆորումը կառուցված է 6 թեմատիկ կոալիցիաների շուրջ, որոնք միտված են գենդերային հավասարության և կանանց իրավունքների կենսագործմանը և խթանմանը տնտեսական հզորացման, առողջապահության, կլիմայի, ինչպես նաև գենդերային բռնության կանխարգելման, ֆեմինիստական շարժումների և առաջնորդության ոլորտներում։

Կոալիցիաների առաջնորդների կազմում ընդգրկված են թվով 20 երկրներ, ՄԱԿ համակարգի մաս կազմող և միջազգային այլ կառույցներ, բարեգործական կառույցներ, ինչպես նաև ոլորտում հայտնի հասարակական կազմակերպություններ։

Առաջնորդների ընտրությունը կայացվել է համապատասխան թեմատիկ ոլորտում թեկնածուների հանձնառության դրսևորման, ոլորտում արձանագրած առաջընթացի և այլ չափանիշների հիման վրա։ Տեխնոլոգիաների և նորարարության ուղղությամբ թեմատիկ կոալիցիայի  համար առաջնորդության իր թեկնածությունն առաջադրելիս՝ Հայաստանը ներկայացրել է ՀՀ կառավարության առաջնահերթություններն` ուղղված կանանց իրավունքների պաշտպանության, քաղաքական և տնտեսական ոլորտներում կանանց դերի բարձրացմանը, ինչպես նաև տեխնոլոգիաների ու նորարարության ոլորտներում ՀՀ արձանագրած առաջընթացն ու հանձնառությունները։

«Տեխնոլոգիաների և նորարարության» թեմատիկ կոալիցիայի աշխատանքներն ուղղորդվելու են առաջնորդ ընտրված 3 երկրների՝ Հայաստանի, Ֆինլանդիայի և Թունիսի կողմից, ՄԱԿ մանկական հիմնադրամի /UNICEF/ և Հեռահաղորդակցության միջազգային միության /ITU/ հետ համագործակցությամբ։

«Հավասարության սերունդ» ֆորումի շրջանակներում նախաձեռնվում է նաև Կանանց, խաղաղության, անվտանգության և մարդասիրական գործողության վերաբերյալ նորարարական համաձայնագրի մշակումը, որը միտված է ռեսուրսների ներդրմանը` խաղաղության, անվտանգության և մարդասիրական գործողությունների ապահովման նպատակով։ Համաձայնագիրը կամրապնդի արդեն իսկ առկա նախաձեռնությունների և համագործակցությունների համակարգումը՝ վերահաստատելով կանանց և երիտասարդների մասնակցության կարևորությունը խաղաղության, անվտանգության և մարդասիրական գործընթացներին՝  ՄԱԿ-ի Անվտանգության խորհրդի Կանանց, խաղաղության և անվտանգության վերաբերյալ 1325 բանաձևի ընդունումից 20 տարի անց։

Հավելյալ տեղեկատվությունը հասանելի է «Հավասարության սերունդ» ֆորումի  կայքում։

Թեմայի շուրջ առավել մանրամասն.

«Հավասարության սերունդ» համաժողովին ընդառաջ

«Հավասարության սերունդ» ֆորում.  Հայաստանն ընտրվեց «Տեխնոլոգիաներ և նորարարություն» կոալիցիայի առաջնորդ երկիր

Կանանց միջազգային օր. COVID-19-ի  ճգնաժամը կնոջ դեմք ունի