Հայաստանում թերսնված է յուրաքանչյուր 5-րդ երեխան

Մասնագետները  ահազանգում են, որ Հայաստանում մինչև 5 տարեկան երեխաների մոտավորապես 20 տոկոսը, այսինքն յուրաքանչյուր հինգերորոդը  քրոնիկ թերսնման խնդիր ունի  և դա  ազդում է նրանց ֆիզիկական և մտավոր զարգացման վրա: Որպես հետևանք այդ երեխաների  հասակը կարճ է և քաշը նվազ է միջին ցուցանիշների համեմատ, նրանց մոտ կա  նաև սակավարյունության խնդիր:

Այս տվյալները օրերս ներկայացրեց  ՀՀ առողջապահության նախարարության մոր և մանկան առողջության պահպանման վարչության պետ Կարինե Սարիբեկյանը  «Սնուցումը որպես կարևոր բանալի տնտեսական զարգացման համար. իրավիճակը Հայաստանում» թեմայով համաժողովին, որը կազմակերպել էին Հայ օգնության ֆոնդը, Վորլդ Վիժն Հայաստանը և Հայաստանի Ամերիկյան համալսարանը:

Կարինե Սարիբեկյաի ներկայացմամբ   գյուղաբնակ երեխաների մոտ թերքաշությունը ավելի շատ է (23 տոկոս), քան քաղաքաբնակների մոտ (18 տոկոս):
Եվ ևս մեկ ուշագրավ փաստ. ըստ հետազոտությունների՝ թերսնման ամենաբարձր ցուցանիշը գրանցվել է Սյունիքի մարզում՝ երեխաների մոտ 36 տոկոսի մոտ, երկրորդ տեղում Լոռու մարզն է:  Ամերիկյան համալսարանի Հանրային առողջապահության ֆակուլտետի փոխդեկան Վարդուհի Պետրոսյան դիտարկմամբ  միջազգային փորձագետները   բացատրում են այս փաստը   ոչ միայն սննդի պակասի , այլ հանքարդյունաբերության ազդեցության հետ.  ծանր մետաղները անցնելով երեխայի օրգանիզմ  սննդի կամ ջրի հետ  խոչնդոտում են օգտակար նյութերի յուրացումը:

Թերսնման հետ մեկտեղ Հայաստանում կա նաև ճարպակալման խնդիր: «Եթե երեխանի 19 տոկոսը ունեն թերաճություն, ապա 15 տոկոսի մոտ գերքաշության խնդիր է, ինչը նշանակում է, որ երեխան ուտում է, քաղցած չի մնում, բայց ուտում է հիմնականում ածխաջրերով հարուստ, հիմնականում ոչ օգտակար և առողջությանը  չնպաստող սնունդ՝ քաղցր, մակարոնեղեն, ալրեղեն։ Այս դեպքում երեխան քաշը շատ է հավաքում, և սա ոչ միայն  աղքատության, այլ ճիշտ սնվելու մասին  գիտելիքների  խնդիր է»,-  պարզաբեց Սարիբեկյանը:

Նրա խոսքով , աղքատությունը թիվ մեկ գործոնն է ,որ բերում է  երեխայի թերսնման,  թերսնվող երեխաների տոկոսը ավելի բարձր է աղքատ ընտանիքներում: «Աղքատ ընտանիքներում թերսնման  ցուցանիշը 25 տոկոս է, բայց խնդիրը նաև առկա է բարեկեցիկ ընտանիքներում՝ 16 տոկոս։ Սա խոսում է այն մասին, որ միայն աղքատությունը չէ միայն պատճառը, այն նաև ոչ ճիշտ սննդակարգը, մայրերի գիտելիքների պակասը»։

Մանկաբուժ Սերգեյ Սարգսյանը իր հերթին նշեց , որ բազմաթիվ հայաստանյան ընտանիքներ այսօր չեն կարողանում իրենց թույլ տալ սպիտակուցային սնունդ գնել՝ միս, կաթնամթերք ու ձկնեղեն, որոնք մինչև 5 տարեկան երեխաների սննդակարգում ամեն օր պետք է լինեն: Նրանք հիմնականում էժան, շուտ հագեցնող և ոչ օգտակար սնունդ են օգտագործում՝ կարտոֆիլ , մակարոնեղեն, հաց ու քաղցրավենիք: Խնդիրը, մասնագետի դիտարկմամբ, անշուշտ   մեծ մասամբ սոցիալական է, սակայն ապահոված ընտանիքներում էլ  հաճախ երեխայի սնունդը  սխալ են կազմակերպում.  երեխային վաղ տարիքից գործարանային արտադրության չիփսեր, հյութեր ու թխվածքաբլիթ և այլ արհեստական հավելումներով սնունդ են տալիս:

«Նոր կառավարության ծրագրում մոր և մանկան առողջությունը գերակա խնդիրներից մեկն է: Եվ 3 ուղղություններից հենց մեկը վերաբերում է սնուցման վիճակի բարելավմանը: Մենք կառավարությանը ներկայացնելու ենք երեխաների սնուցման ռազմավարական ծրագիրը»,- եզրափակեց   Սարիբեկյանը:

Կարդացեք  թեմայի շուրջ մեր կայքում.

Աշխարհում յուրաքանչյուր 5-րդ երեխան տառապում է թերաճությունից…