Գոհար Սարդարյան . «Մտել ենք քաղաքականության մեջ, պետք է պայքարենք»

Ներկայացնում ենք մեր հարցազրույցը Վանաձոր համայնքի ավագանու անդամության եւս մեկ թեկնածու, ՀԱԿ ներկայացուցիչ, ՀՀՇ անդամ Գոհար Սարդարյանի հետ: Նա շուրջ քսան տարի աշխատել է Վանաձորի թիվ ինը հանրակրթական դպրոցում որպես մաթեմատիկայի ուսուցչուհի: Համայնքի ավագանու ընտրություններում առաջադրվում է առաջին անգամ:

-Ես երկար տարիներ աշխատել եմ որպես մանկավարժ: Երբ կրճատումներ սկսվեցին, ես մեր դպրոցում` թիվ 9-ը դպրոցում,  պայքարեցի կրճատվողների համար: Արդյունքում եղավ այնպես, որ ինձ էլ կրճատեցին: Դրանից հետո դատարանի որոշմամբ նորից վերականգնվեցի, որովհետեւ ապօրինի կրճատում էր…. Իշխանությունների հետ չեմ հարմարվել հայացքներով, դրա համար էլ ընդիմմության շարքերում եմ: անօրեն: Միշտ էլ պայքարել եմ անօրինության  դեմ` թե աշխատավայրում թե  դրանից դուրս: Հենց դա էլ ստիպեց ինձ, այսպես ասած, քաղաքականության մեջ մտնել: Համայնքի ավագանու անդամության թեկնածու եմ առաջադրվել մեր կուսակցության՝  ՀՀՇ –ի որոշմամբ:

-Առաջին անգամ եք առաջադրում Ձեր թեկնածությունը , ինչպե՞ս եք պատկերացնում ընտրապայքարը:

-Մինչ այս ես աշխատել եմ մեր ընկերների համար եւ ընտրական գործընթացն ինձ համար խորթ չէ: Իհարկե, առաջադրվելով անձամբ, ես եւս օժանդակության կարիք ունեմ: Դժվար գործընթաց է, քանի որ ավելի հմուտներ, իշխանական թեւեի ներկայացուցիչներ կան, բայց եթե մտել ենք քաղաքականության մեջ, պետք է պայքարենք:

Որքանո՞վ է աջակցում Ձեր շրջապատը /ընկերական շրջապատ, ընտանիքի անդամներ, կոլեկտիվի անդամներ/ Ձեր քաղաքական գործունեությանը:

-Իմ ընտանիքը եւ հարազատները դրական արձագանքեցին իմ առաջադրմանը: Ես ունեմ մեծ շրջապատ, գործընկերներ: Նրանք նույնպես ողջունեցին: Բոլորն էլ` յուրաքանչյուրն իր չափով  պատրաստակամ են աջակցել , իրազեկել իրենց շրջապատին:

Կոնգրեսական իմ գործընկերները նույն կերպ աջակցում են, յուրաքանչյուրն իր շրջապատում աշխատում է: Առաջիկա օրերին պատրաստ կլինի իմ նախընտրական բուկլետը:

-Եթե ընտրվեք ավագանու անդամ, ի՞նչ կցանկանայիք փոխել Ձեր համայնքում : Ինչպիսի՞ պլաններ ունեք:  

-Առաջին հերթին, իհարկե համայնքի տեսքը, որպեսզի քաղաքը լինի ասֆալտապատ, լուսավոր, որպեսզի մենք քայլենք մեր քաղաքում եւ մաքրություն տեսնենք, որն այսօր բացակայում է: Այդ հարցերի լուծմանը շատ ավելի հետեւողական կլինեմ, կցանկանամ վերականգնել  քաղաքի ավանդական միջաոցառումները: Ընթացքում, իհարկե, որոշումներ կլինեն, որոնցում ես կարտահայտեմ իմ դիրքորոշումը, օրինակ հողատարածքների օտարման հետ կապված այս ապօրինությունների վերաբերյալ: Քաղաքի տեսքը գցում են տնակները: Մարդիկ , իհարկե, ոչ իրենց մեղքով հայտնվել են տնակներում եւ չգիտես ինչու այդ հարցի լուծումը ձգձգվում է, մարդիկ ավելի են հուսահատվում: Որպես ՀԱԿ եւ ՀՀՇ թեկնածու, ես իհարկե, կփորձեմ տեղայնացնել մեր ծրագրերն ու մոտեցումները այս կամ այն հարցի շուրջ:

 -Իսկ ո՞վ է Ձեր ընտրողը: Ի՞նչ կարգախոսով եք հանդես գալու:

-Հանուն լուսավոր վաղվան: Սա է կարգախոսս, իսկ իմ ընտրողը հասարակ ժողովուրդն է, հասարակ քաղաքացին, ով կհասկանա, որ իմ կատարած աշխատանքը հանուն իր շահի պետք է լինի: Մինչ իմ առաջադրվելը ես պայքարել եմ տնակային ավանի բնակիչների խնդիրների լուծման համար, պայքարել եմ մանկավարժների համար, կարծում եմ, նրանք էլ կընտրեն ինձ:

-Ինչ եք կարծում , Հայաստանում կանանց նկատմամբ խտրականություն կա՞: Ձեր նկատմամբ դա երբևէ զգացե՞լ եք:

-Ոչ, խտրականություն իմ նկատմամբ չեմ զգացել, թեպետ որոշակիոորեն խտրականության դրսեւորում կարող ենք համարել այն, որ ես իմ իրավունքները չեմ կարողացել պաշտպանել եւ ինձ հետ վարվել են այնպես, ինչպես ցանկացել են: Գուցե ես տղամարդ լինեի, խնդիրն այլ կերպ լուծվեր: Խոսքը դպրոցի մասին է, իսկ ինչ վերաբերվում է հասարակական խնդիրներին, ապա թեեւ արդյունքի չենք հասել, բայց դա կարծում եմ ընդհանուր իրավիճակով է պայմանավորված:

Ձեր կարծիքով Հայաստանում  կա՞ն խոչընդոտներ կանանց քաղաքական մասնակցության համար:

-Ոչ, չեմ կարծում:

-Այս դեպքում ինչո՞վ կբացատրեք, որ համայնքի ղեկավարի թեկնածուների շարքում կին չկա, իսկ համայնքի ավագանու հիսուներեք թեկնածուներից ընդամենը երկուսն են կին::

-Երեւի թե կանայք գտնում են, որ անզոր են, որովհետեւ թեկնածուների մեծամասնությունը իշխանական թեւի ներկայացուցիչներ են, մյուս կողմից էլ  շատերին  չի հետաքրքրում քաղաքականությունը, այսինքն, կյանքն իր հունով ինչպես կընթանա, այնպես էլ կգնան:

Ափսոսում եմ, որ մեր հայ կանանց մասնակցությունը քաղաքական գործընթացներին քիչ է, նրանք պոտենցիալ ունեն, բայց  չեն օգտագործում այն:

Զրուցեց` Մարիաննա Ղահրամանյանը