ՄԱԿ–ի Կանանց Կարգավիճակի Հանձնաժողովի 57-րդ նստաշրջանը երեկ ավարտեց իր աշխատանքները:  Երկարատեւ  ու բուռն քննարկումներից հետո   հանձնաժողովին հաջողվեց  համաձայնեցնել ամփոփիչ փաստաթուղթը, որը դատապարտում է կանանց ու աղջիկների դեմ բռնության ցանկացած դրսևորում եւ միջոցներ  առաջարկում այդ երեւույթը վերացնելու եւ կանխարգելելու ուղղությամբ:

ՄԱԿ-ի պաշտոնական կայքից տեղեկանում ենք, որ կազմակերպության անդամ 130 երկիր համաձայնություն է հայտնել փաստաթղթի ընդունման վերաբերյալ: ՄԱԿ-ի գլխավոր քարտուղարը կոչ է արել իշխանություններին «պատմական» հավաքի արդյունքները վերածել կոնկրետ գործողությունների` նպատակ ունենալով պաշտպանել կանանց իրավունքներն ու հիմնարար ազատությունները:

«Կանանց դեմ բռնությունը մարդու իրավունքների զարհուրելի  խախտում է, գլոբալ սպառնալիք, վտանգ` ուղղված  հանրային առողջության դեմ և կոպիտ բարոյական վիրավորանք: Անկախ այն բանից, թե որտեղ են ապրում, ինչ մշակույթ կամ սոցիալական կարգավիճակ ունեն, յուրաքանչյուր կին ու աղջիկ իրավունք ունի ապրելու առանց վախի»,-ասել է Բան Կի Մունը, ավելացնելով, որ կանայք իրավունք ունեն ապրել առանց բռնության և իրենց պոտենցիալն ուղղել ապագայի համար:

17 էջանոց փաստաթուղթը պարտավորեցնում է բոլոր երկրներին ձեռնպահ մնալ կանանց նկատմամբ բռնություններն արդարացնելու համար իրենց ավանդույթներին, սովորույթներին ու կրոնական սկզբունքներին հղումներ անելուց: Այն կոչ է անում ՄԱԿ-ի անդամ-պետություններին խթանել սեռական դաստիարակությունը դպրոցներում, ստեղծել բռնության զոհերին հրատապ օգնության համակարգ և ավելի խիստ պատժել գենդերային հողի վրա կատարված սպանությունների համար: Փաստաթղթով կարևորվում է  բռնության ենթարկված կանանց հոգեբանական, բժշկական ծառայությունների տրամադրումը, ինչպես նաև սեռական ու վերարտադրողական առողջության պաշտպանության անհրաժեշտությունը:

Հռչակագիրը նաև հաստատում է սեռերի իրավահավասարության սկզբունքը, տարբեր ոլորտներում, հատկապես կրթության, քաղաքականության, տնտեսության, սոցիալական հավասար ներկայացվածությունը:

ՄԱԿ-ը հղում անելով իր տվյալներին, նշում է, որ 10 կանանցից 7-ն իրենց կյանքի ընթացքում ենթարկվում են բռնության:  125 երկրներ ունեն օրենք, որոնք պատիժ են սահմանում ընտանեկան բռնությունների համար, միաժամանկ 603 մլն կին ապրում է այնպիսի երկրներում, որտեղ ընտանեկան բռնությունը քրեական հանցագործություն չի համարվում:

«Ընդունելով այս փաստաթուղթը, կառավարությունները հստակեցնում են, որ խտրականությունն ու կանանց նկատմամաբ բռնությունները տեղ չունեն 21-րդ դարում: Հետդարձ չկա»,- եզրափակել  է ՄԱԿ-ի գլխավոր քարտուղարը:

Հիշեցնենք, որ 2003-ին նման  փաստաթուղթ ընդունելու  Հանձնաժողովի փորձը   ձախողվել էր, քանի որ  անդամ երկրներին չհաջողվեց համաձայնության գալ:

«Շատ ոգևորված եմ ձեռք բերված համաձայնության համար: Պետք է շարունակել առաջ շարժվել` հասնելու այն օրվան, երբ աղջիկներն ու կանայք կապրեն  առանց վախի, առանց բռնության ու խտրականության»,- ասել է ՄԱԿ-Կանայք գործակալության  նախագահ ՝  Միշել Բաչելետը, «պատմական» անվանելով ընդունված փաստաթուղթը:

Հ. Կարապետյան

Կարդացեք թեմայի շուրջ մեր կայքում.

Դեսպան Կարեն Նազարյանի ելույթը ՄԱԿ-ի Կանանց կարգավիճակի հանձնաժողովում

Բան Կի Մուն. «Այդ կանանց մենք ասում ենք. ՄԱԿ-ը ձեր կողքին է»