Աիդա Սարգսյան. «Մեր փորձը վարակիչ կլինի նաև մյուս կանանց համար»

Աիդա Սարգսյանը  Լոռու մարզի Գյուլագարակ համայնքի դպրոցի հաշվապահն ու պրոֆմիության նախագահն է: Նոյեմբերին կայանալիք ՏԻՄ ընտրությւններում նա առաջադրել է իր թեկնածությունը խոշորացող Գյուլագարակ համայնքի ավագանու անդամության համար: Ամուսնացած է, ունի երկու երեխա, թոռնիկներ:53 տարեկան է:

 -Ո՞րն է պատճառը, որ  որոշեցիք սկսել քաղաքականությամբ զբաղվել:

-Ճիշտն ասած դեռ տարիներ առաջ էի ուզում մասնակցել ընտրություններին: Այն ժամանակ գրանցումս Վանաձորի էր, չստացվեց, իսկ նախորդ ընտրություններին տղայիս կինն էր դրել իր թեկնածությունը ավագանու անդամության համար: Չուզեցի խանգարել իրեն: Այս անգամ դպրոցիս կոլեկտիվը ոգևորեց, ասացին՝ թեկնածությունդ դիր անպայման: Ու որոշեցի մասնակցել:

-Խոշորացվող Գյուլագարակ համայնքում միակ կին թեկնածուն եք: Ի՞նչ դժվարություներ ունի կինը տղամարդկանց հետ մրցապայքարում:

– Մեկը մեկին ճանաչում է, մի քիչ դժվար ընտրություն է ժողովրդի համար. մեկը բարեկամ է, մեկը հարազատ է, մեկը ընկեր է: Քանի որ գյուղում մի քանի ազգից մի քանի տղամարդ է դրել իր թեկնածությունը, մրցակցությունը մեծ է: Բոլորն էլ լավ տղաներ են, լավ մարդիկ են, ամենքն իր շրջապատն ու իր բարեկամությունն ունի:Մեկը կարող է բարեկամաշատ,  ընկերաշատ լինի ու դրա հաշվին ընտրվի: Բայց ինձ թվում է դա հաշվի առնելը սխալ է ընտրության հարցում: 

Ես ասում եմ՝ սրտով տվեք ձեր քվեն, մտածեք՝ ո՞վ կարող է ինչ-որ բան անել, սա միայն մեր գյուղը չի, որ մտածեք՝ լավ, դե ով ուզում է  լինի, մեր գյուղացին է, մեր գյուղն է: Ուզում եմ, որ ժողովուրդը ճիշտ ընտրություն կատարի բոլոր գյուղերում, որ ընտրվեն նրանք, ովքեր կարող են գործ անել:

-Ըստ Ձեզ, ո՞րն է պատճառը, որ կանայք քիչ են առաջադրում իրենց թեկնածությունը ընտրություններում:

-Ընդունված է, որ կինը պետք է մնա տանը՝ խոհանոցում: Բայց չէ, ես այդպես չեմ կարծում: Այսօր կինն ավելի շատ է աշխատում, ավելի շատ է մտածում իր ընտանիքի հոգսերի մասին, քան տղամարդը: Ինքն է տղամարդուն ուղղորդում,  մեծամասամբ ինքն է ամեն ինչ անում:

-Հայաստանի Հանրապետական կուսակցության անդամ եք, սակայն ինքնառաջադրվել եք: Ովքե՞ր են Ձեզ սատարողները:

– Իմ դպրոցն է ինձ աջակցում, գյուղում մեծամասամբ  կանայք են ոգևորված,  ուզում են,  որ անպայման ավագանու անդամ դառնամ: Ինձ աջակցում են նաև երեխաներս, հարազատներս, ովքեր կանգած են կողքիս ու ասում են՝ միշտ առաջ, մենք քո հետ ենք:

-Որքանո՞վ է կարևոր կանանց ներգրավվածությունը ՏԻՄ համակարգում:

-Ինձ թվում է դա բացի լավից, վատ բան չի տա: Կինն ավելի լավ գիտի իր ընտանիքին  ի՞նչ է պետք, ի՞նչի կարիք ունի: Կանայք կզգան, որ իրենց խոսքը հաշվի են առնում,  որ իրենք էլ կարող են ինչ-որ բան անել, ինչ-որ բանի հասնել: Դա վարակիչ կլինի նաև մյուս կանանց համար ու հաջորդող ընտրություններին իրենց թեկնածությունն առաջադրող կանանց թիվն ավելի մեծ կլինի:

 -Ի՞նչ եք կարծում, ինչո՞ւ պետք է մարդիկ ընտրեն հենց Ձեզ:

 -Կարծում եմ , ինձ հիմնականում կանայք են ընտրելու: Կընտրեն նաև այն տղամարդիկ, ովքեր կգտնեն, որ ես կարող եմ, որ ակտիվ եմ:

Ցավոք, շատերը դեռ ծանոթ-բարեկամ սկզբունքով են ընտրում:Հաճախ ասում են՝ վայ, Աիդա ջան, քեզ շատ ենք հարգում, սիրում, բայց մեր էսինչը դրել է, չեմ կարող իրեն չընտրեմ:

-Ի՞նչ խորհուրդ կտաք բնակիչներին:

– Թող բոլորը դուրս գան, բոլորը մասնակցեն ընտրություններին ու ընտրեն սրտով:

Գայանե Սարգսյան