Շնորհավորում ենք «Հավասար հնարավորություններ» լրագրողական մրցույթի հաղթողներին

Կայացավ «Հավասար հնարավորություններ» հաշմանդամության թեմայով զանգվածային լրատվամիջոցների 13-րդ ամենամյա մրցույթի մրցանակաբաշխությունը։ Մրցույթն իրականացնում են «Հույսի կամուրջ» և «Առաքելություն Արևելք» կազմակերպությունները։ Նպատակը հաշմանդամություն ունեցող անձանց համար հավասար հնարավորությունների ստեղծման գաղափարի տարածումն է: Այս տարի մրցույթին ներկայացվել էին 22 լրագրողական աշխատանքներ, որոնցից` 9-ը՝ տպագիր և էլեկտրոնային հոդված, 9-ը՝ տեսանյութ և 4-ը՝ ռադիոնյութ և մուլտիմեդիա: Այս մասին է հայտնում  Disability info կայքը:

«Լրագրողական հոդված» անվանակարգում երրորդ մրցանակը շնորհվեց «Հետք» ինտերնետային թերթի թղթակից Արփինե Մինասյանին՝ «Հաշմանդամությունը հանրակրթությունից դուրս մնալու պատճառ» հոդվածի համար (100 000 դրամ)։ Երկրորդ մրցանակը «Aysor.am» և WomenNet.am տեղեկատվական-վերլուծական պորտալի լրագրող Լիա Խոջոյանին՝ «Ներառական կրթությունը մանկապարտեզից է սկսվում» հրապարակման համար (150 000 դրամ)։ Առաջին մրցանակը հանձնվեց «Հետք» ինտերնետային թերթի լրագրող Քրիստինե Աղալարյանին, որը ներկայացրել էր «Մատչելի» Երևան՝  նկարված թեքահարթակներով» հոդվածը (200 000 դրամ)։

«Ռադիո և մուլտիմեդիա» անվանակարգում մրցանակ (100 000 դրամ)շնորհվեց «Yerevan.today» կայքի լրագրող Տաթև Միրզոյանին՝ «Հաշմանդամություն ունեցողները՝ կառավարության տեսադաշտից դուրս» շարքի համար:

«Հեռուստատեսային» անվանակարգում երրորդ մրցանակը (100 000 դրամ) «Հանրային հեռուստաընկերություն» լրագրող Սոսե Բաղդասարյանինն էր՝ «Ներառական կրթությունը» տեսանյութի համար, երկրորդը (150 000 դրամ) ՝ «Ար» հեռուստաընկերության լրագրող Անի Բաղդասարյանինը՝ «Ներառական կրթությունը սթրես չէ» տեսանյութի համար։ Առաջին մրցանակը (200 000 դրամ) հանձնվեց Հանրային հեռուստաընկերության լրագրող Սուսան Բադալյանին՝ «Սիրո ուժը» ռեպորտաժի համար։

Աշխատանքի և սոցիալական հարցերի նախարարությունը պատվոգիր հանձնեց «Արմենիա» հեռուստաընկերությանը՝ հաշմանդամության հիմնախնդիրների պարբերաբար լուսաբանման և հավասար հնարավորությունների գաղափարի տարածմանը հետամուտ լինելու համար։

Աղբյուրը՝  Disability info

Հ.Գ.  WomenNet.am –ը շնորհավորում  է Լիա Խոջոյանին եւ մրցույթի բոլոր մասնակիցներին՝ նորանոր մասնագիտական հաջողություններ մաղթելով նրանց: