1915 ֆիլմի պրեմիերա. անցյալից չես փախչի/ թրեյլեր

Մշակույթ, արվեստ

Ապրիլի 17-ին՝ Լոս Անջելեսում եւ ԱՄՆ այլ քաղաքներում կայացել է Հայոց ցեղասպանության 100-ամյակին նվիրված «1915» ֆիլմի պրեմիերան: Ապրիլի 25-ին ֆիլմը կցուցադրվի նաեւ Հայաստանում ՝ «Մոսկվա» եւ «Սինեմա Սթար» կինոթատրոններում:

Հոգեբանական այս թրիլլերի ռեժիսորներն ու սցենարի հեղինակներն են՝ Կարին Հովհաննիսյանը (Րաֆֆի Հովհաննիսյանի որդին է) և Ալեք Մուհիբյանը: Պրոդյուսեր Թերրի Լեոնարդի եւ միջազգային դերասանական կազմի՝ Սիմոն Աբգարյանի, Անժելա Սարաֆյանի, Սեմ Փեյջի, Նիկոլայ Կինսկու եւ Ջիմ Փիդդոքի համատեղ ուժերով «1915» ֆիլմը նկարահանվել է Լոս Անջելեսում: Հայազգի դերասանուհի Անժելա Սարաֆյանը հայտնի է հատկապես «Մթնշաղ. Սագա. Լուսաբաց», «Պարանոյա», «Ներգաղթյալ» ֆիլմերից: Դերասան Սիմոն Աբգարյանն էլ ճանաչված է «Արարատ», «Կազինո Ռոյալ», «Սպին» կինոնկարներից: «1915»-ի երաժշտությունը գրել է Գրեմմի մրցանակակիր, երաժիշտ Սերժ Թանկյանը (System Of a Down):

Ֆիլմը ներկայացնում է պատմության ամենասարսափելի իրադարձությունները՝Հայոց ցեղասպանության դառը էջերը, պատմում մի մարդու վիճելի առաքելության մասին, որը փորձում է վերադարձնել մոռացված ցեղասպանության ուրվականներին:

«Այս ֆիլմը հիշողության մասին է: Մեկ դար անց՝ 2015 թվականի ապրիլին, միլիոնավոր հայեր կհիշեն Հայոց ցեղասպանության մասին: Ցեղասպանություն, որը ժամանակակից պատմության առաջին ողբերգական դեպքն էր և հաջորդ ՝ Հոլոքոստի, Ռուանդայի, Կամբոջիայի, Սուդանի ցեղասպանությունների ծրագիրը: Ֆիլմը ներկայացնում է, թե ինչ է պատահում, երբ անցյալը մերժվում է, թե ինչ է պատահում, երբ դրան ընդդիմանում են: «1915» ֆիլմը կոչ է անում մեզնից յուրաքանչյուրին դադարեցնել ժխտողականությունը և խիզախությամբ հանդիպել անցյալի ուրվականներին», – նշված է կինոնկարի պաշտոնական՝ 1915the movie.com կայքում: