Ֆլեշմոբ՝ «Պայքարենք հանուն մեր իրավունքների»

Այսօր  դեկտեմբերի 10-ին՝ մարդու իրավունքների միջազգային օրվա առթիվ Երևանի Կոմիտասի անվան պետական կոնսերվատորիայի հարակից այգում  տեղի ունեցավ  ֆլեշմոբ, որի մասնակիցները կոչ արեցին կառավարությանը չփակել Մարդու Իրավունքների Պաշտպանի մարզային գրասենյակները և լուծել այդ գրասենյակների գործունեությունն ապահովող բոլոր խնդիրները: 

Հիշեցնենք, որ նոյեմբեր ամսից ՄԻՊ-ի 6 մարզային գրասենյակները դադարեցրել են իրենց աշխատանքները ֆինանսական միջոցների բացակայության պատճառով: Հայաստանի կառավարությունը մարզային գրասենյակների գործունեության շարունակության ճակատագիրը պետք է դիտարկի 2014 թվականի ՀՀ պետական բյուջեի նախագծի Աժգային Ժողովի նիստերի քննարկման ընթացքում:

Միջոցառումը կազմակերպվել էր «Ընդդեմ իրավական կամայականության»  հասարակական կազմակերպության և ՕՔՍՖԱՄ Հայաստանում միջազգային կազմակերպության համատեղ ջանքերով: Միջոցառմանը միացան  «Երիտասարդություն հանուն Արդարության», ինչպես նաև Քաղաքացիական Հասարակության Համագործակցության Ցանցի կազմակերպությունները:

«Պայքարենք հանուն մեր իրավունքների» կարգախոսով ելույթ ունեցավ  «Շենգավիթ» վարչական շրջանի Պատանեկության ստեղծագործական կենտրոնի  պարային խումբը: Իրենց պարային բեմադրությամբ երեխաները հրավիրեցին  ներկաների ուշադրությունը ՀՀ-ում մարդու իրավունքների պաշտպանության վիճակի և այդ ոլորտում գործող հասարակական կազմակերպությունների գործունեության կարևորության վրա:

Նշենք, որ Մարդու իրավունքների օրվան ընդառաջ  «Ընդդեմ իրավական կամայականության» ՀԿ-ն  և ՕՔՍՖԱՄ Հայաստանում կազմակերպությունը համատեղ հայտարարություն էին տարածել՝ հանրության ուշադրությունը   հրավիրելով այն փաստին, որ  անհրաժեշտ ֆինանսավորման բացակայության պայմաններում  կարող է փակվեն Մարդու իրավունքների պաշտպանի (ՄԻՊ) մի շարք գրասենյակներ մարզերում: Հայտարարության շուրջ սկսված ստորագրահավաքին միացան նաև    ֆլեշմոբի մասնակիցները և անցորդները:

Հայտարարության տեքստին կարելի է ծանոթանալ այստեղ.