Օրվա թեման՝ երիտասարդների արտագաղթն է/ վիդեո

Այսօր ՝ օգոստոսի 12-ին  Երիտասարդության միջազգային օրն է, որի թեման այս տարի  երիտասարդության միգրացիան է: Ըստ ՄԱԿ-ի Սոցիալ-տնտեսական հարցերի վարչության ազգաբնակչության բաժնի տվյալների՝ աշխարհում կա 15-24 տարեկան մոտ 27 միլիոն միգրանտ, ինչը կազմում է աշխարհի 214 միլիոն միգրանտների մեկ ութերորդը։ 

« Հայաստանից մեկնող երիտասարդ միգրանտները ևս մեծ թիվ են կազմում», – այսօր հրավիրած ասուլիսում ասաց ՄԱԿ-ի Բնակչության հիմնադրամի հայաստանյան գրասենյակի գործադիր տնօրեն Գարիկ Հայրապետյանը՝ հղում անելով  Հայաստանի երիտասարդության ազգային զեկույցի շրջանակներում կատարված հարցմանը, որի համաձայն, հարցված երիտասարդների 78, 5 տոկոսը հնարավորության դեպքում կմեկնի տարբեր նպատակներով կմեկներ Հայաստանից, իսկ 36.8 տոկոսը՝ կմեկներ ընդմիշտ:

« Պարզ է, որ միգրացիան վտանգներ է պարունակում, թե մեր երկրի, թե հատկապես երիտասարդ միգրանտների համար՝ Հայաստանից տանելով ուժերով լի, վերարտադրողական լավագույն տարիքում գտնվող մեր հայրենակիցներին, նրանց երբեմն կանգնեցնելով խտրականության եւ շահագործման ռիսկի առջեւ», – նշեց   բանախոսը:

Երիտասարդների միգրացիայի պատճառները բազմաթիվ են: Հայրապետյանի խոսքով, հարցվածների 48 տոկոսը կարծում է, որ արտերկրում ավելի հեշտ է աշխատանք գտնել, 42 տոկոսը  նշել է, որ արտերկրում աշխատավարձերը ավելի բարձր են:  Մեկնելու համար այլ պատճառների թվում  են . արտերկրում չեն ոտնահարում մարդու իրավունքները՝ 12 տոկոս, Հայաստանում առկա անօրինականությունները ՝ 8 տոկոս, մեզանում  տիրող հոգեբանական մթնոլորտը ՝ 4,5 տոկոս, Հայաստանում առկա քաղաքական իրավիճակը 3 տոկոս:

ՄԱԿ ՓԳՀ գրասենյակի արտաքին կապերի եւ հասարակական տեղեկատվության համակարգող Անահիտ Հայրապետյանի դիտարկմամբ՝ «Մեր հայ երիտասարդներն իրենց պոտենցիալն ու գիտելիքը տալիս են այլ երկրի: Էյնշտեյնը փախստական էր եւ ասել է՝ իրերի կապոցը միակ բանը չէ, որ փախստականը բերում է իր հետ նոր երկիր»:

Այդուհանդերձ, Հայաստանում սկսում է ձևավորվել նաև ակտիվ, ոչ անտարբեր երիտասարդության մի շերտ, որը ներառում է թե՛ տեղացի, թե՛ սփյուռքահայ և փախստական երիտասարդների: Այդ մասին էլ ասուլիսին ցուցադրվեց ՄԱԲՀ երիտասարդ հավասարակիցների ցանցի կամավորների նկարահանած փոքրիկ ֆիլմը: