Մարինե Քոչարյան. «Հաճախ հենց կանանց մեջից է պետք հանել կարծրատիպերը նրանց պաշտպանելու համար»   

Մեր զրուցակիցն է «Օրինաց երկիր» կուսակցության կանանց խորհրդի նախագահ, #186 ավագ դպրոցի տնօրեն Մարինե Քոչարյանը: Նա ՕԵԿ ռեյտինգային ցուցակի 8-րդ հորիզոնականում է, առաջադվել է Նոր Նորք- Քանաքեռ-Զեյթուն- Ավան վարչական  շրջանում:

Երկու ամիս առաջ պայքարում էիք ավագանու թեկնածության համար, այսօր առաջադրվել եք ԱԺ պատգամավորության թեկնածու, երկու ամսվա մեջ, երկրորդ ընտրարշավն է…

-Ես ինձ համար մշակել եմ մի կանոն, երբ դժվարանում եմ, կամ կանգնում եմ դժվարության առաջ, միշտ հիշում եմ առավել դժվար խնդիրներ, որոնք լուծել եմ և տվյալ դժվարությունը փոքրացնում եմ, բաժանում մասերի,  քանի որ  փոքր խնդիրներին միշտ էլ հեշտ է լուծում գտնել: Հետո քաջալերում եմ ինքս ինձ, մտքում ասելով, դու ուժեղ ես, դու կարող ես, հավաքվի, կողմնորոշվի, ոչ ոք քո փոխարեն ոչինչ չի անելու և այսպես գնում եմ առաջ:

Ինչու՞ պետք է ընտրել ձեզ և ինչու՞ պետք է ընտրել ձեր կուսակցությունը:

-Պետք է ընտրել մեր կուսակցությունը քանի որ նա միշտ ասելիք ունի, ունի իր դիմագիծը, նախորդ Ազգային Ժողովում,  երբ մենք ներկայացված էինք  6 հոգով  և կարողանում էինք ժողովրդին հուզող հարցերը, ժողովրդի միջից դուրս եկած հարցերը բերել խորհրդարան և դրանք օրենքի ուժ էին ստանում: Ընտրել ինձ, որովհետև ես անտարբեր մարդ չեմ, սրտացավ մարդ եմ,  ես գտնում եմ, որ պետք է օգնեմ մարդկանց՝ լինելով մի միջավայրում, որտեղ կարողանամ բարձրացնել նրանց խնդիրները և դրանց լուծումներ գտնեմ օրենքի ձևով: Որ ոչ մի քաղաքացի չնսեմանա իր պրոբլեմի լուծման համար, այլ օրենքով լուծվեն այդ խնդիրները:

Իսկ ինչպիսի՞ն եք տեսնում ապագա Ազգային Ժողովը:

-Ես շատ եմ ցանկանում, որ այսօրվա այս լավ հնարավորությունից կարողանանք օգտվել, և ձևավորվի ճիշտ Ազգային ժողով, այնտեղ հավաքվեն մարդիկ, ովքեր չմտածեն իրենց անձի մասին, այլ մտածեն ժողովրդի մասին: Ժողովուրդը շնորհակալ է,  նա մի քիչ էլ կարող է սպասել, եթե տեսնի, որ իրոք ամեն ինչ արվում է ի շահ ժողովրդի:

Բացի այդ, ես կարծում  եմ որ կանայք պետք է շատ լինեն Ազգային ժողովում: Կինը ավելի ուշիմ է, կուղորդի, կզգուշացնի, կառաջարկի և միասին կկարողանան ավելի շոշափելի արդյունքների հասնել: Կինը միշտ իր շուրջը հարմարավետություն է ստեղծում, եթե կանայք շատ լինեն ԱԺ-ում, մեր քաղաքներն ու գյուղերն  ավելի հարմարավետ կդարձնենք մեր քաղաքացիների համար  և նրանք  էլ արտերկիր գնալու մասին չեն մտածի:

Ի՞նչ նոր գաղափորներով եք գալիս ընտրություններին:

-Գաղափարները իմը չեն, կուսակցությանն են, որոնք ծնվել են մեր միասնական քննարկումների արդյունքում, և ես իմ հնարավորությունների սահմաններում  ամեն ինչ անելու եմ, դրանք իրականացնելու համար: Իսկ ինչ վերաբերում է ինձ. ես միշտ բարձրացնելու եմ կրթության հարցը, որակյալ կրթություն ունենալու հարցը, ուսուցչի դերի բարձրացման հարցը, ինչպես Խորհրդային միության ժամանակ հարգված էր ուսուցիչը, այսօր էլ պետք է հասնել դրան, պետք է դպրոցում ռեֆորմներ անել, այդ թվում բարոյահոգեբանական տեսանկյունից:Միշտ խոսելու եմ և բարձրացնելու եմ ներառական կրթության հետ կապված հարցերը: Քանի որ համոզված եմ.  հաշմանդամություն ունեցող երեխաները պետք է սովորեն իրենց հասակակիցների հետ, պետք է լինեն հասարակության լիիրավ անդամ:

Եթե ընտրվեք , խորհրդարանում կպաշտպանե՞ք կանանց շահերը:

-Իհարկե, անպայման, եթե կինը չպաշտպանի կնոջ շահերը, ով պետք է պաշտպանի: Ես գործի բերումով շատ եմ շփվում կանանց հետ, և հաճախ հենց կանանց մեջից է պետք հանել կարծրատիպերը նրանց պաշտպանելու համար: Եթե խոսեմ դպրոցից, առաջինից- տասներորդ  յուրաքանչյուր դասարանում լավ սովորող աղջիկների թիվը մեծ է, ԲՈՒՀ ընդունվող աղջիկների թիվն էլ է մեծ, իսկ մասնագիտությամբ աշխատող կանանց թիվը քիչ է: Սրանք բոլորը խնդիրներ են, որոնք լուծումներ են պահանջում:

Ձեր կարծիքով, որո՞նք են այսօր առաջնահերթ լուծում պահանջող խնդիրները:

-Առաջնահերթ խնդիր եմ համարում այն, որ հասարակության մեջ պետք է բարձրացնել մարդու դերը, մարդու արժեքը: Որ մարդը հասկանա, որ ինքը ապրելու, աշխատելու,հանգստանալու, բուժվելու և վերջապես արժանապատիվ ապրելու իրավունք ունի, ու  այդ ամենը ստանալու համար արտերկիր չգնա:

                                                                                                   Կ. Պետրոսյան