Այսօր կայացած ասուլիսներում  եվրոպական մի շարք   կառույցների  դիտորդական առաքելություններ,   ընդհանուր առմամբ,  դրական գնահատական են  տվել ՀՀ նախագահական ընտրություններին, նշելով, որ այս ընտրությունները զգալի առաջընթաց էին թե  2012-ի խորհրդարանական ընտրությունների , թե նախորդ նախագահական ընտրությունների համեմատ:  Մասնավորաես, ԵԱՀԿ/ԺՀՄԻԳ-առաքելության նախնական զեկույցի համաձայն՝ «Հայաստանի Հանրապետության փետրվարի 18-ի նախագահական ընտրությունները ընդհանուր առմամբ լավ կազմակերպված էին և բնութագրվում էին հիմնարար ազատությունների նկատմամբ հարգանքի դրսևորմամբ»:

ԵԱՀԿ ԽՎ պատվիրակություն .

« Մենք առաջնորդվում ենք նույն երկրում նախորդ ընտրությունների հետ համեմատելու սկզբունքով »

«Ցանկալի կլիներ, որ Հայաստանում նախագահական ընտրությունները քայլ առաջ լինեին ողջ տարածաշրջանի համար», – այս մասին, այսօր` փետրվարի 19-ին, մամուլի ասուլիսում հայտարարեց ԵԱՀԿ խորհրդարանական վեհաժողովի դիտորդական առաքելության ղեկավար Տոնինո Պիցուլան, հույս հայտնելով, որ հենց այդպես էլ կլինի:

«2012-ի խորհրդարանական ընտրությունների համեմատ, այս նախագահական ընտրությունները լուրջ առաջընթաց քայլ են: Այս ժամանակաշրջանում բարեփոխվել է օրենսդրությունը, ինչպես նաև լրատվամիջոցները բոլոր թեկնածուների քարոզարշավի հավասար լուսաբանում են ապահովել»,-ասաց նա:

Պիցուլան նաև նշեց, որ ընտրական գործընթացը գնահատելիս ԵԱՀԿ դիտորդական առաքելությունը ղեկավարվում է ոչ թե մի երկիրը մյուսի հետ համեմատելու, այլ նույն երկրում նախորդ ընտրությունների հետ համեմատելու սկզբունքով:

Հարցին, թե ինչպես է գնահատում ընտրությունների արդյունքները, Պիցուլան պատասխանեց, որ իրենց առաքելության նպատակն ընտրությունների արդյունքները գնահատելը չէ, միաժամանակ նշելով, որ նախագահական ընտրությունների ընթացքում մասնակցությունն ավելի ցածր է եղել, քան` խորհրդարանական ընտրությունների ժամանակ:

Իր հերթին, ԵԱՀԿ ԽՎ գլխավոր քարտուղարի տեղակալ Թինա Շոնը նշեց, որ Հայաստանում նախագահական ընտրությունները համապատասխանել են ժողովրդավարական չափանիշներին, սակայն քիչ մրցակցային էին:

Շարունակելով իր գործընկերոջ միտքը, Պիցուլան ընդգծեց, որ թեկնածուների քարոզարշավը նույնպես հետաքրքիր չէր, քանի որ չկային դեբատներ, իսկ նրանց նախընտրական ծրագրերը բարդ էին ընտրողների համար:

ԵԽԽՎ դիտորդական առաքելություն.

« Ընտրություններում զգալի առաջընթաց է արձանագրվել »  

Կասկած չկա, որ Հայաստանում տեղի ունեցած նախագահական ընտրություններում զգալի առաջընթաց է արձանագրվել` 2008-ի նախագահական ընտրությունների համեմատությամբ: Այս մասին, այսօր` փետրվարի 19-ին, մամուլի ասուլիսում հայտարարեց ԵԽԽՎ դիտորդական առաքելության ղեկավար Քարին Վոլդսեթը: Նրա խոսքով` Հայաստանում առաջընթացն արձանագրվել է իրավական ոլորտում, լրատվամիջոցների աշխատանքում, խոսքի ազատության և հասարակական ակցիաներ անցկացնելու ոլորտներում: «Այն հանգամանքը, որ նախագահական ընտրություններում մասնակցությունը կազմել է 60-64 տոկոս, նշանակում է, որ մարդիկ կամք են դրսևորել ժողովրդավարական ընտրություններ անցկացնելու համար»,-ասաց Վոլդսեթը:

Սակայն, նրա խոսքով` ընտրությունների արդյունքում եղել է վարչական ռեսուրսների չարաշահում. «Այդուհանդերձ, ընտրությունները հարթ են անցել, թեև եղել են որոշ միջադեպեր կապված վստահված անձանց ու թանաքի հետ»:

Վոլդսեթը նաև նշել է, որ շատ ջանքեր են գործադրվել ընտրացուցակների ճշգրտման համար: «Ընտրությունները մրցակցային են եղել, որի վկայությունը Սերժ Սարգսյանի և Րաֆֆի Հովհաննիսյանի ստացած տոկոսներն են, համապատասխանաբար 68 և 36 տոկոս: Ընտրությունների մրցակցայնության մասին է վկայում նաև նախագահի թեկնածուների թիվը»:

Անդրադառնալով նրան, որ երկրի հիմնական քաղաքական ուժերը թեկնածու չեն առաջադրել, Վոլդսեթը նշել է, որ դրանում պետք է մեղադրել հենց իրենց. «Հայաստանը գտնվում է ճիշտ ուղու վրա դեպի ժողովրդավարություն»:

ԵԱՀԿ/ԺՀՄԻԳ դիտորդական առաքելություն.

«Ընտրություններին խախտումներ են արձանագրվել, որոնք, սակայն, չեն ազդել արդյունքների վրա»

Հայաստանի նախագահական ընտրություններում տեղ են գտել խախտումներ, սակայն դրանք չեն կարող ազդել ընդհանուր պատկերի վրա: Այդ մասին այսօր մամուլի ասուլիսում հայտարարել է ԵԱՀԿ/ԺՀՄԻԳ դիտորդական առաքելության ղեկավար, դեսպան Հայդի Թալիավինին: Նրա ասելով, ընտրությունների դիտարկումն անցկացրել են կազմակերպության շուրջ 300 դիտորդներ, ովքեր եղել են ավելի քան 1000 ընտրատեղամասերում:

Նրանք արձանագրել են կրկնակի քվեարկության, լցոնումների, գործող նախագահի շտաբի ներկայացուցիչների կողմից ընտրողների նկատմամբ ճնշման, վարչական ռեսուրսի կիրառման դեպքեր: Բացի այդ, դեսպանի ասելով, բազմաթիվ պետական պաշտոնյաներ, լինելով արձակուրդում, ակտիվորեն մասնակցել են գործող նախագահի նախընտրական քարոզարշավին:

Այդուհանդերձ, ըստ Թալիավինիի, չի կարելի հաշվի չառնել նաև առաջընթացն ընտրական գործընթացի կազմակերպման գործում, ինչն արձանագրված է դիտորդների միջանկյալ զեկույցում: Փաստաթղթում, մասնավորապես, ասվում է, որ ընտրությունները, ընդհանուր առմամբ, լավ էին կազմակերպված: Թեկնածուներն ունեին  նախընտրական քարոզարշավ անցկացնելու հավասար հնարավորություններ, ԶԼՄ-ներն անաչառ էին լուսաբանում թեկնածուների ընտրարշավը: Միևնույն ժամանակ, ըստ դիտորդների, դիտվել է թեկնածուների միջև քաղաքական բանավեճերի պակաս, փաստորեն, չեն եղել քննարկումներ, որոնք կարող էին ավելի հագեցած ու հետաքրքիր դարձնել նախընտրական քարոզարշավը:

Դիտարկմանը, թե որոշ թեկնածուներ վստահված անձանց պակաս ունեին, ԺՀՄԻԳ ներկայացուցիչը նշել է, որ իրենք առաքելությունը չի ենթադրում թելադրել թեկնածուներին` ինչ անել:

Հարցին, արդյոք իրենք տեղյակ չեն եղել կոպիտ խախտումների մասին, և չեն տեսել տեսագրությունները, Եվրախորհրդարանի ներկայացուցիչ Միլան Ցաբրնոխը հավաստիացրել է, որ իրենց նման բաներ հայտնի չեն: Նա նաև նշել է, թե առաջին անգամը չէ Հայաստանում և առաջին ընտրությունները չի դիտարկում: Նա եղել է տեղամասերում և չի տեսել խախտումներ, որոնք կազդեին ընտրությունների արդյունքի վրա:

Թալիավինին հաղորդել է, որ ԵԱՀԿ/ԺՀՄԻԳ դիտորդները ևս 10 օր կմնան Հայաստանում` իրադարձությունների հետընտրական զարգացումներին հետևելու համար: Ընտրությունների արդյունքների վերաբերյալ վերջնական զեկույցը կազմակերպությունը կհրապարակի երկու ամիս  անց:

Նշենք, որ ԵԱՀԿ/ԺՀՄԻԳ ընտրությունների դիտորդական առաքելությունը սկսել է իր աշխատանքները Երևանում հունվարի 10-ից: Այն ներառում է 16 մասնագետներ մայրաքաղաքում և 24 երկարաժամկետ դիտորդներ՝ տեղակայված ամբողջ Հայաստանի տարածքում:

Ընտրությունների օրը  283 կարճաժամկետ դիտորդներ  են տեղակայվել, այդ թվում,  24 անդամ ԵԽԽՎ պատվիրակությունից, 9 անդամ ԵԽ պատվիրակությունից:

Դիտորդական առաքելության նախնական զեկույցի տեքստին ամբողջությամբ կարելի է ծանոթանալ այստեղ.

http://www.osce.org/hy/odihr/elections/99677  Հայերեն

http://www.osce.org/odihr/elections/99675         Անգլերեն