«Տատիկս անապատում ստիպված է եղել թողնել իր ուժասպառ եղած մորը…». Շվեդիայի խորհրդարանի փոխխոսնակ

«Հուսով եմ 100-ամյակը կդառնա մտածելու տարի բոլորի համար», – այսօր Երևանում ընթացող «Ընդդեմ ցեղասպանության հանցագործության» գլոբալ ֆորումի ընթացքում հայտարարեց Շվեդիայի խորհրդարանի փոխխոսնակ և Ցեղասպանությունը վերապրածների ժառանգորդ, ազգությամբ հայ Իզաբելլա Դինգիզյանը:

Նա իր ելույթում պատմեց իր տատիկի կյանքի ողբերգական պատմությունը: Տատիկի անոնն էլ էր Իզաբելլա, նա 12 տարեկան է եղել 1915 թվականին, ստիպված հազարավոր հայերի հետ անցել է անապատի դժվարին, տառապալի ճանապարհը, ստիպված է եղել թողնել այնտեղ իր ուժասպառ եղած մորը, որին հետո այլևս երբեք չի տեսել:

«Նա կորցրեց իր ամբողջ ընտանիքին: Հասավ Բաղդատ, որտեղ ապրում էր որպես որբ: Այնուհետև հանդիպեց պապիկիս՝ Աբրահամին, ով իր սեփական պատմությունն ուներ: Իրաքում են ապրել, հետո տեղափոխվել են Շվեդիա: 104 տարեկանում է մահացել տատիկս: Մենք պետք է հիշենք և հիշեցնենք, թե մեզանից յուրաքանչյուրն ինչ պատասխանատվություն ունի: Մեր պատասխանատվությունն է գործել բոլոր այն ռեժիմների դեմ, ովքեր այսօր էլ շարունակում են ցեղասպանություններ գործել»,- ասաց Շվեդիայի խորհրդարանի փոխխոսնակը:

Նշենք, որ Իզաբելլա Դինգիզյանը 2006 թվականից Շվեդիայի խորհրդարանի՝ Ռիքսդագի անդամ է: Նա եղել մշակույթի հարցերով հանձնաժողովի անդամ և նաև անդամակցել միշարք այլ ` այդ թվում` աշխատաշուկայի ու կրթության հանձնաժողովներին: Նա Ստոկհոլմի Վարչաշրջանի խորհրդի ընտրատարածքի պատգամավոր է: 2014-ի ընտրությունների արդյունքով Իզաբելլա Դինգիզյանը դարձել է Շվեդիայի խորհրդարանի երրորդ փոխխոսնակ:

Կարդացեք թեմայի շուրջ մեր կայքում.

«Ես եկել եմ Հայաստան որպես քույր, ցավի քույր»…

100 Lives. կարեւորենք մարդկային արժեքները

«Զոհի հոգեբանությունը սարսափելի է», ասել է Ռուբեն Վարդանյանը

Ցեղասպանությունից հայ որբերին փրկած օտարազգի կանայք

Դառնալով մեկ ուրիշը …