«Կանանց ռեսուրսային կենտրոնը» չստացավ Էթիկայի հանձնաժողովի աջակցությունը

«Կանանց Ռեսուրսային Կենտրոն» հասարակական կազմակերպությունը վերջերս  դիմում էր ներկայացրել   ԱԺ էթիկայի հանձնաժողովին , ըստ որի  ՀՀԿ խմբակցության պատգամավոր  Հայկ Բաբուխանյանը , ով հանդիսանում է «Իրավունք Մեդիա» հոլդինգի խմբագրական խորհրդի նախագահ, սատարել է հոլդինգի «Zaruhi.com» ամսագրում և «Իրավունք» թերթում «Կանանց ռեսուրսային կենտրոնի» դեմ զրպարտչական նյութեր տպագրելուն: Հարցը քննվել է նաև առաջին ատյանի դատարանում, որը հաստատել էր զրպարտության փաստը: Այժմ հերթը Վերաքննիչ դատարանինն է`  կընդունվի այն վարույթ թե ոչ դեռ պարզ չէ, սակայն Էթիկայի հանձնաժողովը իր հերթական նիստում  հկ-ի դիմումը  մերժեց:

Ըստ ԱԺ Էթիկայի ժամանակավոր հանձնաժողովի նախագահ Նիկոլ Փաշինյանի` ՀՀԿ խմբակցության անդամ Հայկ Բաբուխանյանը էթիկայի կանոնները չի խախտել:  Նիկոլ Փաշինյանը դիմումի  մերժելը պարզաբանեց այն հանգամանքով, թե հանձնաժողովը «չի կարող քննարկել ինչ-որ հիմնարկի, տվյալ պարագայում լրատվամիջոցի գործունեությունը  և որ վարույթի համար անհրաժեշտ է կոնկրետ պատգամավորի վարքը դիտարկել:

Նշենք, որ այս պատմությունը սկիզբ առավ այն պահից, երբ  նշված պարբերականներում  սկսեցին  շրջանառվել «Կանանց ռեսուրսային կենտրոն» հկ-ի  եւ «Կյանքի խոսք» կրոնական կազմակերպության կապի  մասին չհաստատված  լուրերը,  ընդ որում  հրապարակումները  զուրկ չէին «տուն քանդող» և նմանատիպ այլ վիրավորական արտահայտություններից:

«Կանանց ռեսուրսային կենտրոնը» շտապեց հերքել այդ լուրերը և հարցի քննարկումը տեղափոխեց դատարան (ի դեպ, կրոնական կազմակերպությունն էլ իր հերթին):  2012-ի դեկտեմբերի 7-ին Երևան քաղաքի Արաբկիր և Նուբարաշեն վարչական շրջանների ընդհանուր իրավասության դատարանը վճռեց` «Զարուհի հրատարակչական տուն» ՍՊԸ-ին և Ռուսլան Թաթոյանին պարտավորեցնել «ընտանիք քանդող» և «գրանտածիծ» արտահայտությունների միջոցով «Կանանց ռեսուրսային կենտրոն» հասարակական կազմակերպությանը վիրավորանք հասցնելու համար հրապարակային ներողություն խնդրել` ներողության տեքստը www.zaruhi.com կայքէջում տեղադրելու միջոցով: Դատարանը որոշեց նաև պատասխանողներից բռնագանձել 50.000 ՀՀ դրամ հօգուտ հկ-ի  որպես փոխհատուցման գումար:

Սակայն այս ամենով խնդիրը չհարթվեց, այլ հակառակը` լրագրող Ռուսլան Թաթոյանը դատարանում դրսևորեց անհարիր պահվածք` նույնիսկ վճռի հրապարակումից հետո  հկ-ի ներկայացուցիչներին ուղղված «դուք իրավունք չունեք ոչ միայն հայ կին կոչվելու, այլ նաև ապրելու», «Գնացեք մեռեք» կոչերով:

                                Էնզելա Մակարյան