«Կանայք, խաղաղություն , անվտանգություն». ներկայացվեց Լեռնային Ղարաբաղի զեկույցը

Պատերազմ և Խաղաղություն

Այսօր «Կանանց ռեսուրսային կենտրոն Հայաստան» հասարակական կազմակերպությունը Շուշիում գտնվող «Կանանց ռեսուրսային կենտրոն Շուշի» (ԿՌԿՇ) մասնաճյուղի հետ համատեղ ներկայացրեցին Լեռնային Ղարաբաղում ՄԱԿ-ի Անվտանգության խորհրդի՝ Կանանց, խաղաղության և անվտանգության վերաբերյալ հայտնի N1325 բանաձևի իրագործման մասին զեկույցը:

Այն նվիրված է Լեռնային Ղարաբաղում բնակվող կանանց հիմնախնդիրներին, հետկոնֆլիկտային իրավիճակում նրանց առջև ծառացած մարտահրավերներին և հնարավոր լուծումներին: Հաշվետվությունը ներառվելու է «Կին խաղաղարարների միջազգային ցանց»-ի (Global Network of Women Peacebuilders ) – կողմից պատրաստած 2014 թ-ի տարեկան հաշվետվության մեջ:

Հիշեցնենք, որ 2000 թվականից սկսած ՄԱԿ-ի Անվտանգության խորհուրդն ընդունել է յոթ բանաձև, որոնք անդրադառնում են խաղաղության և անվտանգության հարցերում կանանց մասնակցության տարբեր կողմերին:

Առաջինը՝ ՄԱԿ-ի Անվտանգության խորհրդի 2000-ին ընդունված թիվ1325 բանաձևն էր, որն ուղղված է կանանց վրա զինված հակամարտությունների հետևանքների բացասական ներգործությունը մեղմելուն և կանանց դերի բարձրացմանը հակամարտությունների կանխարգելման և կարգավորման, խաղաղության պահպանման գործում:

2008-ին ընդունված թիվ1820 բանաձևը շեշտադրում է այն փաստը, որ հակամարտության պայմաններում սեռական բռնությունը ռազմական հանցագործություն է եւ դիտարկում է սեռական բռնությունը և հատկապես բռնաբարությունը որպես պատերազմական զենք:

Հաջորդ՝ թիվ 1888 (2009) բանաձևում ՄԱԿ-ի ԱԽ-ն հանձնարարում է խաղաղապահ առաքելություններին զինված հակամարտության պայմաններում ապահովել կանանց և երեխաների պաշտպանությունը սեռական բռնությունից:

Մյուս ` թիվ 1889 (2009) բանաձևը պարունակում էր քաղաքական գործընթացներում կանանց մասնակցության հետագա ընդլայնման կոչ, ինչը 1325 բանաձևի իրականացման անհրաժեշտ պայմանն է: Խոսքը« ըստ էության, իշխանության համար պայքարի կանոնների փոփոխության մասին է:

2010-ին ընդունվեց 1960 բանաձևը, որը կանանց հիմնախնդիրների, խաղաղության և անվտանգության համատեքստում զարգացնում և խորացնում է սեռական բռնության դեմ պայքարի թեման:

2013-ին ընդունվեցին ևս 2 բանաձև: Մեկը հակամարտությունների ընթացքում սեռական բռնության համար անպատժելիության դեմ պայքարին ուղղված թիվ 2106 բանաձևն է, որում շեշտադրվում է կանանց քաղաքական, սոցիալական և տնտեսական իրավունքների ու հնարավորությունների ընդլայնման անհրաժեշտությունը: Մյուսը՝ թիվ 2122 բանաձևը, որում ընդգծվում է հիմնական 1325 բանաձևի կատարման համար պատասխանատվությունը, ինչպես նաև խաղաղության, անվտանգության և զարգացման ապահովման ջանքերում կանանց մասնակցության կարևորությունը:

Կարդացեք թեմայի շուրջ մեր կայքում.

Մարիեթ Շուրման. «Կանանց դերը խաղաղության հասնելու համար չափազանց որոշիչ է»

Կանանց, խաղաղության ու անվտանգության մասին ՄԱԿ-ի բանաձևերը

Կանայք եւ անվտանգությունը