«Ես ինձ վիրավորված կզգամ, որ հաղթեմ կնոջը»…

 «Գայանե Առուստամյանը կին է, եւ ես ինձ վիրավորված կզգամ նրան բանավեճում հաղթելով, քաղաքական բանավեճի կմտնեմ միայն նրա առաջնորդ Լեւոն Տեր-Պետրոսյանի հետ, ցանկացած ժամանակ ես պատրաստ եմ Տեր-Պետրոսյանի հետ մտնել բանավեճի»,- այս մասին  NEWS.am –իn  ասաց ԱԺ ՀՀԿ-ական պատգամավոր, թիվ 1 ընտրատարածքում պատգամավորության թեկնածու առաջադրված Ռուբեն Հայրապետյանը` անդրադառնալով նույն ընտրատարածքում ՀԱԿ-ի  թեկնածուԳայանե Առուստամյանի` իրեն բանավեճի հրավիրելու առաջարկին:

Ռուբեն Հայրապերյանի ակնհայտ սեքսիստական բնույթի մեկնաբանությունները  դրանով չսահմանափակվեցին: Նա հայտարարեց,  որ «վախենում է Գայանե Առուստամյանից,  վախենում է, որ կարող է ծեծել իրեն»: «Լավ է բռնցքամարտի մրցման չի հրավիրել», – ասաց նա:

Նշենք, որ թիվ 1 ընտրատարածքում պատգամավորության թեկնածու առաջադրված, լրագրող, Հայ ազգային կոնգրեսի անդամ Գայանե Առուստամյանը իրեն քաղաքական մրցակից է համարում նույն ընտրատարածքում առաջադրված, ԱԺ ՀՀԿ-ական պատգամավոր Ռուբեն Հայրապետյանին եւ նրան հրավիրել էր բանավեճի: Այս մասին նա հայտարարել էր  երեկ՝  լրագրողների հետ հանդիպման ժամանակ:

«Թող գա հրապարակ, թող գա խոսենք, թող ներկայացնի իր պատկերացումները խորհրդարանում աշխատելու ծրագրերի մասին, թող ընտրողը կողմնորոշվի, ընտրի ինձ կամ իրեն», – ասաց  Առուստամյանը:

Ինչ վերաբերում է այս ընտրատարածքում առաջադրված մյուս թեկնածու Ստյոպա Սաֆարանին, ապա նրա հետ բանավիճելու խնդիր Առուստամյանը չունի: Սակայն, եթե Սաֆարյանին հանդիպի էլ, ապա նրա հետ «հաճույքով» կխոսի «ընդդիմության և ընդդիմադիր լինելու փիլիսոփայության մասին»:

P.S. Հիշեցնենք, որ քաղաքական բանավեճը  կեղծ ջենտլմենական դաշտ տեղափոխելու անընդունելի փորձերը առաջին անգամ չէ, որ արվում են   մեր քաղաքական դաշտում: Ժամանակին Գագիկ Բեգլարյանը Կենտրոն համայնքի  տեղական ընտրություններում իրեն մրցակից կնոջ՝ ՀԺԿ անդամ Ռուզան Խաչատրյանի  հասցեին հայտարարել էր. «Ամոթ է կնոջը պարտվելը»…

Կարդացեք նաեւ բլոգում՝

Կինը՝ «նիխտ պոլիտիկ». Ռուբեն Հայրապետյանը` սեքսիստ